ХХ-шо курым тӱҥалтыште писатель Максим Горькийын лӱмжӧ  Л. Толстой да А.Чеховын лӱмышт дене тӧр шындалтын, кеч Горький нунын тунемшышт веле лийын. 1900-ше ийла тӱҥалтышыште тиде писательын произведнеийже-влак икмыняр шӱдӧ тӱжем экземпляр дене савыкталтыныт. Тудын дене ятыр еҥ келшымашым кычалын: меркалыкын лӱмлӧ айдемышт, тале литератор-влак  В.Г. Короленко, Н.К. Михайловский, А.Ф.Кони, П.Н. Милюков, П.Б. Струве 1899 ийыште самырык писатель лӱмеш Петербургышто банкетым ыштеныт, тудым уремыштат шукын паленыт. Вес эллаште Стефан Цвейг, Ромен Роллан, Марк Твен тудлан сай акым пуэныт. Тений Максим Горькийын шочмыжлан 150 ий. Тиде лӱмгечылан пӧлеклалтын «Тӱняште Айдеме лияш» кас-портрет. 

Шошо каныш жапыште Россий мучко Йоча книга арня эрта. Икымше гана Йоча книга пайрем 1946 ий 26 мартыште йоча писатель Лев Кассильын шонымашыж почеш эртен. Тудо «Книган лӱмгечыже» маналтын.

 25 гыч 30 март марте ме книгагудышто йоча-влакым вучена! Нине кечылаште ятыр оҥай мероприятий эрта: писатель-влак дене творческий вашлиймаш, сылнымут пайрем, у книга презентаций, мульсеанс ден мастар класс-влак.

В.Х.Колумб лӱмеш Республикысе йоча да самырык-влаклан книгагудо шошо каныш жапыште тунемше-влакым  «Паледа мо Книган пӧртшым?» лӱман интерактивный экскурсийыш пагален ӱжеш. Модыш путешествий тендам книгагудын чыла пӧлка ден пӧлемышкыже намиен коштыкта. Тыгак те книгагудына кӧн лӱмжым нумалше еҥ нерген лишкырак пален налыда.

Ак 30 теҥге.

Ончылгоч возалташ телефон 34-15-12.

Книгагудыш пагален ӱжына!

Поэзий кумылан еҥлан
Йӱржат ок ыште лавырам,
Лумат ок петыре йолгорным.
Поэзийлан кеч-кушто — корно…

Поэзий – айдеме тукымын ик эн кӱкшӧ сеҥымашыже, очыни. Шонымашым почеламут корнылашке пыштен, рифмылашке кумылым велен, ончыклыкым шонен да эртышым шарнен, миллион еҥ деке шуктен да тыгодымак шке кумылет пелен кодаш — тидым лач поэзий гына ыштен кертеш. 21 мартыште, Поэзийын тӱнямбал кечынже, ме шке лудшына-влаклан куанле пайремым пӧлеклышна: книгагудын ончер пӧлемыштыже марий поэтессе, МАССР-ын сулло туныктышыжо Зинаида Васильевна Ермакова дене творческий вашлиймашым эртарышна. Тиде авторым ме «Садеран рвезылык», «Садеран корнывожышто», «Чоя Марусь», «Тек куржыт ий-влак»  книгала гоч палена.

Шошо каныш жапыште элнан чыла книгагудылаштыже Йоча книга арня эрта. Мемнан книгапӧртыштӧ тудо молгунамсе семынак «Лудаш, тӱням саемдаш манын!» девиз почеш лиеш. 25 гыч 30 март марте лудшына-влак ятыр оҥай мероприятийыш толын кертыт: писатель-влак дене творческий вашлиймаш, у литератур дене палыме лиймаш, сылнымут пайрем, викторине, конкурс, лудмо акций-влак кумылан-шамычым вучат.

Йоча книга арня икымше гана «еш» каныш дене иктеш толеш. Еш дене пырля оҥай лудмаш поэтессе Жанна Кулалаева дене тӱҥалеш. Тудо туныктен ойлымо йомакше-влак дене палдара. Пайремым «Гармония» усталык ушемын концертше, сылнымут конкурс ден викторине, модыш-влак шуят, йоча-влак ача-ава дене пырля мастар класслаште, еш квест-модышышто участвоватлен кертыт.

 Книгагудыш пагален ӱжына!

Мут – айдеме тукымын кугу сеҥымашыже. Йӱк да тамга полшымо дене ме шке шонымашнам весылан почын пуэн кертына. Кузе лияш, кунам тыйын кӧргыштет йӱлат, шолыт, лӱшкат нимучашдыме шонымаш-влак, а тый пелен улшо еҥ-влаклан тиде шижмашым пӧлеклен от керт гын?

Мут-влак… Мут-влак, кудышт поэзий корнылашке возыт, шерге акан улыт. Эрыкан мут йогын пелен усталыкым вияҥдымаш — калыкын ойыраш лийдыме поянлыкше, тудат сем гаяк, куштымаш гаяк, сӱрет радына гаяк личность семын шочеш.

21 март – Тӱнямбал поэзий кече. Тиде пайрем вашеш «Пӧлеклыме серыман корнылаште» книга ончерым чумырымо. Тушко XX -XXI курымлаште савыкталтше марий поэт-влакын автографан почеламут сборникыштым вераҥдыме. Возен пуымо книга пӧлек-влак содержаний шот дене тӱрлӧ улыт, нуно поэтын кӧргӧ чон шижмашыштым, тӱняумлымашыштым почыт.

Ончерыште улшо автографан сылнымут дене палыме лияш лудшо-влакын сай йӧнышт уло. «Книга-влакынат шке пӱрымашышт уло» манме ойсавыртыш  – автографан савыктыш-шамычлан эн келшыше . Марий поэзийын пӱрымашыж дене теат палыме лийза.

7 мартыште Тӱнямбалсе йӱкын лудмо кече палемдалтын.

Тыгай пайрем LitWorld коммерческий огыл организацийын инициативыж почеш эртаралтеш да еҥ-влакын лудмо праваштым аралаш полша.

Тиде кечын Йошкар-Оласе троллейбус паркын да книгагудын пашаеҥышт-влак Тӱнямбалсе йӱкын лудмо кечылан пӧлеклалтше флешмобым организоватленыт. Нуно 2-шо номеран троллейбусышто шошо, йӧратымаш, ӱдырамаш нерген почеламут-влакым лудыныт. Акцийым пассажир-влак кумылын вашлийыныт да кугу акым пуэныт. Нуно кумдан палыме руш поэт-влакын почеламутыштым колыштыныт.

Лудса! Лудса пырля! Лудса йӱкын! Лудын, ме шкенам да тӱням сайракым ыштена!

Мемнан деке шошо пайрем — 8 Март — лишемеш! Тиде кечым Российыште веле огыл, тыгак Йӱдвел Корейыште да Китайыште палемдат. Моло эллаште кугыжаныш пайрем семын огыт пайремле гынат, 8 Март кажне ийын утларак да утларак палыме кечыш савырна.

Тиде пайрем вашеш мемнан книгагудышто «Кандашымше — ойыртемалтше» лӱман викторине эртен. Тушто 2-шо номеран коррекционной школ гыч тунемше-влак лийыныт.