15 мартыште  самырык тукымым эстетический воспитаний негызеш куштымо «Моторлык дене вашлиймаш» Программе почеш книгагудышто «Марий кундемын мурызыжо» сем портрет шагат лиеш. Тудо кумдан палыме композитор, пианист, профессор да педагог Андрей Эшпайын илыш ден творчествыжлан пӧлеклалтеш. Тудо сем тӱняште кугу кышам коден: симфоний, балет, концерт, камерный пьесе-влакын авторжо. Композиторын мурыжо-влак отечественный эстрадын шӧртньӧ фондышкыжо шукертак пуреныт. Уло илышыж мучко Андрей Яковлевич шочмо эл дек йӧратымашыжым арален, ятыр пашаштыже тудо марий семсавыртышым кучылтын.

Кугу талантан композитор нерген утларак пален налнеда гын, «Марий кундемын мурызыжо» сем портрет шагатым ончалаш уло кумылын ӱжына. Тудо 11 шагатлан тӱҥалеш.

Книгагудыш пагален вучена!

14 мартыште книгагудысо ончер пӧлемыште «Мыйын шонымо пӧртем» выставке почылтеш. Тушто Йошкар-Оласе 7-ше номеран Йоча сымыктыш школын тунемшышт ден выпускникышт-влакын пашашт ончыкталтеш.

Ончаш толшо-влак мотор деч мотор, ойыртемалтше пӧрт-влакым ужын кертыт, лач тушто илаш шонат автор-влак шкештат. Ятыр паша чия да кисть полшымо дене классический живописьын технике йӧнжӧ дене ышталтын. Адакшым эше пӧрт-влакын тӱрлӧ технике полшымо дене ыштыме шкешотан макетыштымат ужаш йӧн лектеш.

Самырык талант-влакын пашаштым аклаш, шкешт дене палыме лияш кумылан-влакым пагален ӱжына!

14.30 шагатлан тӱҥалеш.

Толза, вучена!

2019 ий 21 мартыште В.Х.Колумб лӱмеш республикысе йоча да самырык-влаклан книгагудышто «Йыван Кырла — калык чонышто» шарнымаш кас лиеш. Тудо марий поэт, киноактерын шочмыжлан 110 ий темме лӱмеш эртаралтеш. Вашлиймашыш МАССР-ын сулло туныктышыжо, поэт З.В. Ермаковам ӱжынна. Тудо Шернур район Марисола школышто Йыван Кырла лӱмеш тоштерым почмаште кугу пашам ыштен, актер да поэт лӱмеш поэмым возен.

Кирилл Иванович Иванов кӱчык ӱмырыштыжӧ артист да поэт-лирик семын кумдан чапланен шуктен. Тудын лӱмжӧ отечественный кинематографийын историйыштыже да марий поэзийыште шӧртньӧ буква дене возалт кодын.

1931 ийыште Совет Союзын экранлашкыже «Путевка в жизнь» йӱкан икымше фильм лектын. А афишым  Мустафан шыргыжмыже сӧрастарен. Тудын образшым лачак Йыван Кырла устан почын пуэн.

Тиде ӧрыктарыше айдемын илыш ден творчествыж нерген утларак пален налаш манын, ме тендам книгагудын конференц-залыштыже 21 мартыште 14 шагатлан алал кумылын вучена!

Оксам тӱлыде пурыман.

Февраль тылзыште чапланыше писатель-натуралист Виталий Валентинович Бианкин шочмыжлан 125 ий темын. Тудын книгаже-влак — пӱртӱс нерген ӱстелысе календарь. Ача-ава ден йоча-влаклан В.Бианки кумдан палыме «Лесная газета» книгаж дене, «Лесные домишки», «Теремок», «Чей нос лучше?», «Лесной Колобок – Колючий бок», «Кто чем поет?», «Где раки зимуют», «Первая охота», «Мастера без топора» йомак да ойлымашыж дене палыме. Тудын шочмо пӱртӱсым сайын палымыже, вер-шӧрым йӧратымыже поро ойлымаш ден йомак-влакым возаш кумылаҥденыт. Мемнан изи лудшына-влаклан  В.Бианкин сӧрал йомакше-влакыш Пик лӱман коляиге дене пырля унала миен толаш темлыме.  

Февраль тӱҥалтыште кумдан палыме совет лётчик-испытатель, Совет Союз Герой Валерий Павлович Чкаловын шочмыжлан 115 ий темын. Валерий Чкалов — мемнан юж флотын историйыштыже легенде семын кодын. Тудо сай лётчик веле огыл, тыгак кӱкшӧ пилотажан школым почшо, у самолёт-влакым тергаш методикым ыштыше талантан еҥ. Кугу Отечественный сар жапыште южышто кредалме годым Чкаловын ыштыме суап пашаже кугун полшен. 

Тиде Айдеме да Герой нерген «Каваште — Чкалов» пресс-досье каласкален. Тушто 9-ше номеран школын 7-ше классыштыже тунемше-влак лийыныт. 

Писательын юбилейже вашеш мемнан книгагудышто «Крылов кочан басньыже-влак» сылнымут дуэль эртен. Тушто икымше гана сторителлинг (storytelling (англ.) элемент-влакым (историйым каласкалымаш, повествований) кучылтмо. Тиде оҥай мероприятийыште Сергий Радонежский лӱмеш гимназийысе 2-шо классыште тунемше-влак лийыныт.