Кажне ийын 26 апрельыште мемнан республикна Марий талешке кечым пайремла. Тиде пайремым XVI-шо курымышто илыше марий талешке Полтышын лӱмжӧ дене кылдат. Тудым палемдаш Пӱрӧ олаште лийше икымше гана эртаралтше Марий погынышто кумдан палыме марий просветитель Павел Глезденев темлен. Марий талешке кечым кумдан палемдаш 1990 ий гыч тӱҥалыныт. 

Космонавтика кече –мемнан элыштына ик эн йӧратыме пайрем. Тидлан ӧршаш уке: вет шукынжо изи годым космонавт лияш да сандалыкыш чоҥешташ шонат. 1961 ий 12 апрельыште «Восток» космический корабль дене Юрий Гагарин мланде йыр савырнен. Икымше гана пайремым 1962 ийыште пайремленыт.

Пайрем вашеш 76-шо номеран йочасад ден «Росток» рӱдер, тыгак «Инфосфера» компьютерный школын да 27-ше номеран школын тунемшышт книгагудыш толыныт да Сандалык нерген утларак пален налыныт.    

Мемнан книгагудышто «Калык-влак кокласе келшымаш — Россия — Марий Эл Республика» телекӱвар лийын. Тушто ме Курган оласе В.Ф. Потанин лӱмеш йоча да самырык-влакын книгагудо пашаеҥышт дене да тиде оласе тунемше-шамыч дене экран гоч вияш кылым ыштенна. Вашлиймашыш Йошкар-Оласе 17-ше да 29-ше номеран школла гыч йоча-влак толыныт. Тора йолташна-влак марий калыкын поян фольклоржо, тӱвыраже, юмынйӱлаже нерген пален налыныт. Нунылан марий семӱзгар нерген пален налаш поснак  оҥай лийын, адакшым марий семымат колышт кертыныт. Марий Эл Республикысе Калыкле президент школ гыч «Кӱсле» йоча образцовый ансамбльын кӱслезыже-влак уна-шамычлан марий семы йоҥгалтареныт (вуйлатыше — Марий Эл тӱвыран сулло пашаеҥже Ваютина Е.И.). Тыгак Палантай лӱмеш тӱвыра да сымыктыш колледжын студентше-влак мурызо Анна Захарова да концертмейстер Ксения Белова мемнан вашлиймашым сӧрастареныт.

Кажне ийын апрель тылзе мучаште Ола-влак кокласе родо-тукым кыл тӱнямбал кече эртаралтеш.

Йошкар-Ола иза-шольо семын кум ола дене келшымаш кылым ыштен: Сомбатхей (Венгрий), Бурж (Франций,  1991 ий гыч ), Принстон (США, Касвел Вирджиний, 5 март 2003 ий гыч). Краеведений да периодика пӧлкаште вераҥдыме «Baratsag — тиде келшымаш» лӱман книга ончер тошто Венгрий ола дене палымым ышта. Книга, альбом, фотографий да иллюстраций-влак полшымо дене эртен кодшо пагыт нерген палаш лиеш: мутлан, кунам Свобода манме урем Вашскийыш савырнен, але Какшан сер вес велне чоҥалтше микрорайонлан молан Сомбатхей лӱмым пуэныт да тулеч молат.  

Йоча книга арня — йӱлаш пурышо книга пайрем. Тудо йоча сылнымут ден книгасе герой-влаклан поян. Йомак ден повестьым, роман ден ойлымашым, почеламут ден шотлеммутым серыше автор-влак мыланна чынжымак кугу пайремым пӧлеклат.

        Книгагудышто поэт да киноактер Иванов Кирилл Ивановичын шочмыжлан 110 ий темме лӱмеш пӧлеклалтше  «Йыван Кырла – калык шӱмыштӧ шарнымаш кас эртен. Тудын лӱмжӧ марий кундемыштына веле огыл, тыгак тӱнямбалнат кумдан чапланен: вет лач «Путевка в жизнь» йӱкан икымше фильмыште Мустафан рольжым лачак Йыван Кырла устан модын.