21 февральыште Шочмо йылмын тӱнямбал кечыже палемдалтеш. Тиде пайрем вашеш лудшо-влак дене марий йылмылан  пӧлеклалтше вашлиймаш ыле. Марий калыкын кок официальный диалектше уло: олыкмарий да курыкмарий.

Палыме руш писатель К.Г. Паустовскийын палемдымыж почеш, айдемын шочмо йылмым  палымыж дене тудын культур кӱкшытшӧ веле огыл, гражданский кӱлешлыкшат палдырна. Шочмо мландым йӧратымаш шочмо йылмым йӧратымаш деч посна ок лий. Тиде умылымаш негызеш  «Марий йылме — мыйын шочмо йылме» лӱман вашмутланымаш 9-ше номеран школысо 6, 7, 9 класслаште тунемше-влак дене  эртен.  Тушто йоча-влак кызытсе илышыште йылмым арален кодымо йодышым каҥашеныт. Марий йылмым умбакыжат вияҥдаш манын,  тудо моло калык-влак коклаштат кучылталт кертше манын, мом ыштыман? Нине да моло нергенат вашмутланымашышке тунемше-влак уло кумылын ушненыт.   

Шерге йолташна-влак! Мемнан книгагудынан самырык-влак коклаште эртарыме «Сеҥымаш юбилей» творческий паша Республиканский конкурснам иктешлыме жап толын шуын. Жюрилан аклаш 171 паша пурен: тиде сӱрет да декоративно-прикладной паша-влак. Кугу Отечественный сарлан пӧлеклыме творческий паша-влак Сеҥымашын куанжым да ойгыжым сай почын пуэныт. Жюри самырык тукымын ветеран-влак деке, калыкын сар нерген шарнымашыж деке тыге чон вошт лишеммыжым кӱкшын аклен. Книгагудын ончер залыштыже вераҥдыме экспозицийыште эн сай паша-влак шке верыштым муыныт.

Конкурсышто 20 йоча сеҥышыш лектын. 

Дипломым торжественно кучыктымаш книгагудын конференц-залыштыже лиеш.

 2020 ий 20 февральыште 11 шагатлан тыгай адрес дене вучена: Йошкар-Ола, Эшкинин урем, 10.

Конкурсын участникше ден сеҥышыже-влакым уло кумылын саламлена!

Творческий пашаштышт у кӱкшытым тыланена!

Чыла кумылан-влакым участник-шамычын пашашт дене палыме лияш книгагудын конференц-залыштыже  кажне кечын ( шуматкече деч посна) 9 гыч 16 шагат марте вучена. 

14 февральыште, Книгам пӧлеклыме тӱнямбал кечын, Марий Эл Республикысе тӱвыра, печать да калык-влакын пашашт шотышто министрже К.А. Иванов республикыштына «Йӧратен пӧлеклыза книгам» IV-ше Всероссийский акцийлан тӱҥалтышым пуэн. Константин Анатольевич пайрем ден саламлен да мемнан книгагудылан йочалан возымо у книга-влакым пӧлеклен. Акцийышке республикысе икмыняр тӱвыра тӧнеж ушнен, нунын вуйлатышышт книга пӧлекым шкештак конден кучыктеныт.  Ме шке коллегына-влаклан, книгагудын поро йолташыже да лудшыжо-шамычлан уло кумылын таум ойлена!

Ме йоча да кугыеҥ-влакым йолташ ден родо-влаклан книгам пӧлеклаш, библиотекыш, школыш, йоча учрежденийыш намияш йодына. Акцийыште кажныже шке кумылжым ончыктен кертеш!

Кугу Отечественный сар мемнан элын да тӱнямбалын историйшытыжат посна верым налеш. Тений ме Сеҥымашын 75 ияш лӱмгечыжым палемдена. Тиде Сеҥымаш ятыр подвиг ден йомдарымаш гоч толын. 1942 ийыште Сталинградын пырдыж воктеныже уло тӱнян пӱрымашыже шоген. Юл да Дон эҥерла коклаште ылыжше  Сталинградский кредалмаш Кугу Отечественный сарын умбакыже кузе каяш тӱҥалмыжым рашемден.

«Читая Чехова, я смеюсь, радуюсь, восхищаюсь… Вот определение таланта».
Лев Толстой

Январь тылзыште сылнымут мастар Антон Павлович Чеховын юбилейже ыле, Писатель, драматург, Императорский шанче Академийын Почетный академикшылан 160 ий темын. Тудын ойлымаш ден пьесыже-влак ынде ятыр ий лудшо еҥым сымыстарен шогат. Йошкар-Оласе аграрный колледжын студентше-влак книгагудышто тудын илышыж да творчествыж нерген шарналташ погыненыт. Могайрак лийын тудо, Антон Павлович? Могай шижмаш тудын чонжым чӱчкыдын авалтен? Молан куанен да ойгырен?

22 январьыште книгагудо пашаеҥ-влак эртыше 2019 ийысе пашам иктешленыт. Йыргешке ӱстел семын лийше вашлиймаште нуно тӱҥ сеҥымаш-влак дене пырля проблеман йодыш-влакымат радамленыт, 2020 ийыште ончыклык паша нергенат ойленыт.

Эн ончычак книгагудо директор Е. А. Ерпылёва чыла пашаеҥ-влаклан таум ойлен. Тудо палемден: кодшо ий жапыште ятыр сотрудник шке шинчымашыжым нӧлтен. Коллективын сай пашажлан кӧра таче мемнан регионышто тудо кӱшыл верым налеш.

Марий Эл Республикысе тӱвыра, печать да калыкле паша шотышто министрын алмаштышыже А. Н. Луничкин культур политикыште улшо кӱлешан йодыш-влакым нӧлталын, йоча кенигагудын кӱлешлыкшым пеҥгыдемден да Россий Президент В. В. Путинын 2020 ийысе Федеральный Собранийлан  Посланийже нерген ушештарен. 

Республикын 100 ияш лӱмгечыж вашеш ме кундемнан чапланыше сылнымутчышт-влак нерген каласкалыше «Марий Элын талант памашышт» лӱман циклым почынна. Тудын икымше унаже — поэтесса Валентина Михайдаровна Изилянова.

В. Изилянован поэзийже — пӱсӧ шижмашан, волгыдо шӱлыкан чонсавыртыш. Автор шочмо мланде, калыкше нерген чон вургыж возымо дене пырля айдемын кӧргӧ шижмашыж нергенат келгын шонкала. Лач тидын нергенак 9-ше номеран школын 10 классыштыже тунемше-влак мутланеныт. Нуно «Валентина Изилянова: чон поэзий» лӱман урокышто поэтессын илыш да творчествыж дене палыме лийыныт.