Финанс грамотлык — тиде окса дене кылдалтше йодышым чын иктешлыме годым кучылталтше шинчымаш. Чаманаш кодеш, финанс грамотлыклан ни йочасадыште, ни школышто огыт туныкто… А такше тыгай тӱҥалтыш шинчымашым йочалан изиж годымак пуаш сай. Лач тыгак ыштеныт 76-шо номеран «Ручеек» йочасадын воспитанникше-влак. Нуно Рублик деке унала миен коштыныт да финанс грамотлыкын тӱҥ умлымашыж дене палыме лийыныт. 

Российыште театр ийым палемдыме вашеш да Шкетан лӱмеш марий кугыжаныш драме театрлан 100 ий темме лӱмеш 14 ноябрьыште мемнан книгагудышто Россий Федерацийын сулло артисткыже, Марий Эл Республикын калык артисткыже, Марий кугыжаныш драме театрын артисткыже Маргарита Егоровна Медикова дене вашлиймаш эрта. 

Маргарита Егоровна — мемнан республикыште веле огыл, тыгак ӧрдыж кундемысе театр тӱняште палыме айдеме. Артист дене кажне вашлиймаш — тиде шарнымаш, почеламут, муро дене пойдаралтше спектакль, а эшеже тиде айдеме деч толшо шокшо шижмаш. 

Ме театрым йӧратыше да пагалыше-влакым, тыгак Маргарита Медикован творчествыжым жаплыше еҥым «Театр — тиде мыйын илышем» лӱман вашлиймашке пагален ӱжына. 

Вашлиймаш книгагудын конференц-залыштыже лиеш. Мемнан адресна: Йошкар-Ола, Эшкинин урем,10.

14.00 шагатлан тӱҥалеш.

Марий Эл Республикын шочмо кечыж вашеш мемнан книгагудыштына «Марий кундем, шӱмлан пеш поро тый улат» почеламутым лудмо конкурс эртен. Кажне ийын тыгай конкурс мемнан дене утларак вийым налеш. Ынде нылымше гана усталык шӱлышан йоча-влак, республикнан тӱрлӧ луклаж гыч погынен, почеламут корныла гоч шочмо элым йӧратымышт нерген кумылыштым почыт. Марий поэт-влакын почеламутыштым школласе йоча-шамыч веле огыл, тыгак вузласе, техникум ден колледжласе студент-влакат шергылтареныт. А теве Помар кыдалаш школ гыч Роман Лебедев ден Верх-Ушнур кыдалаш школ гыч  Валентина Кушакова шке возымо почеламутыштым лудыныт. 

Пагалыме лудшо-влак!
 Калык-влакын икоян улмо кече дене тендам шокшын саламлена! 
 Книгагудын паша радамжым шотыш налаш йодына: 
2, 3, 4 ноябрь — каныш кече-влак.

Шочмо эл дек йӧратымашым, коча-кован илыш-йӱлажым пагалымашым, сымыктыш ден сылнымутым шымлымаш кумылым йочалан  изиж годсек шӱмаҥдыман. Книгагудышто тиде шонымаш денак тунемше-влаклан «Изэҥер» краеведений клубым чумырымо. Тушто йоча-влак шочмо кундемын историйжым, марий калык ойпогым, тӱвырам, сымыктышым да сылнымутым шымлаш тӱҥалыт.

Клубын икымше вашлиймашыже марий газет ден журнал-шамыч нерген лийын. 23-шо номеран школын 2-шо классыштыже тунемше-влаклан мемнан пашаеҥна «Кече» журнал ден «Ямде лий» газет дене палдарен. Ӱдыр-рвезе-влак икымше йоча газет ден журналын номерыштым шергалыныт, нунын историйыштым колыштыныт, мо тугай заметка, рубрика ден статья — пален налыныт. Но эн чотшо нунылан  творческий паша келшен, тудыжым уло тӱшка вий дене шуктеныт —  «Кече» журналыш икоян классышт нерген статьям возеныт.

 «Изэҥер» клубын  «Калейдоскоп событий, историй и открытий» лӱман пресс-тусовкыжо сайын эртен!

Пагалыме йолташ-влак!

4 ноябрь — Марий Эл Республикын кечыже. Тиде пайрем вашеш ме тендам «Марий кундем, шӱмлан пеш поро тый улат» почеламутым лудмо конкурсыш пагален ӱжына.

Конкурсышко Марий Эл Республикысе школышто тунемше, профессиональный да кӱшыл шинчымашым пуышо туныктымо тӧнежласе студент-влак ушнен кертыт.

Конкурс 1 ноябрьыште 10.00 шагатлан конференц-залыште тӱҥалеш.

Конкурсын условийже нерген 2019 ийысе Республиканский лудмо конкурсын Положенийыштыже  ончалаш лиеш.

Участвоватлаш заявке 

Книгагудыш пагален ӱжына!

Шукерте огыл книгагудына Моско гыч уна-влакым вашлие. Мемнан деке сылнымут критик, журналист, педагог, «Книгуру» Всероссийский конкурсын экспертше  Ксения Александровна Молдавская ден писатель Ая эН (Ирина Борисовна Крестьева) толыныт.

Пресс-конференцийыште Марий Эл Республикысе тӱвыра, печать да калык-влакын пашашт шотышто министрже К.А. Иванов, министрын алмаштышыже А.Н. Луничкин, журналист ден кугыжаныш книгагудын пашаеҥышт-влак, Йошкар-Оласе туныктыш тӧнежла гыч туныктышо-шамыч лийыныт.

Ксения Молдавская ден Ая эН  йоча да самырык-влаклан эн сай произведний-влакым возымо «Книгуру» Всероссийский конкурс нерген каласкаленыт, кызытсе йоча сылнымут шотышто лекше йодыш-влаклан вашештеныт.