22 январьыште книгагудо пашаеҥ-влак эртыше 2019 ийысе пашам иктешленыт. Йыргешке ӱстел семын лийше вашлиймаште нуно тӱҥ сеҥымаш-влак дене пырля проблеман йодыш-влакымат радамленыт, 2020 ийыште ончыклык паша нергенат ойленыт.

Эн ончычак книгагудо директор Е. А. Ерпылёва чыла пашаеҥ-влаклан таум ойлен. Тудо палемден: кодшо ий жапыште ятыр сотрудник шке шинчымашыжым нӧлтен. Коллективын сай пашажлан кӧра таче мемнан регионышто тудо кӱшыл верым налеш.

Марий Эл Республикысе тӱвыра, печать да калыкле паша шотышто министрын алмаштышыже А. Н. Луничкин культур политикыште улшо кӱлешан йодыш-влакым нӧлталын, йоча кенигагудын кӱлешлыкшым пеҥгыдемден да Россий Президент В. В. Путинын 2020 ийысе Федеральный Собранийлан  Посланийже нерген ушештарен. 

Республикын 100 ияш лӱмгечыж вашеш ме кундемнан чапланыше сылнымутчышт-влак нерген каласкалыше «Марий Элын талант памашышт» лӱман циклым почынна. Тудын икымше унаже — поэтесса Валентина Михайдаровна Изилянова.

В. Изилянован поэзийже — пӱсӧ шижмашан, волгыдо шӱлыкан чонсавыртыш. Автор шочмо мланде, калыкше нерген чон вургыж возымо дене пырля айдемын кӧргӧ шижмашыж нергенат келгын шонкала. Лач тидын нергенак 9-ше номеран школын 10 классыштыже тунемше-влак мутланеныт. Нуно «Валентина Изилянова: чон поэзий» лӱман урокышто поэтессын илыш да творчествыж дене палыме лийыныт. 

2020-шо ийыште Марий Эл Республик 100 ияш лӱмгечыжым пайремлаш тӱҥалеш. Тидын нерген Указым  Россий Федерацийын Президентше эше 2013 ийыштак  луктын.

Марий автономный областьым 1920 ий 4 ноябрьыште ыштыме.  Марий Эл Республикын историйжат поян, тӱвыражат шкешотан, пӱртӱсшат сӧрал. Марий калык, кужу илыш корныштыжо нимогай тӧрсырым ончыде, шке муро-куштымашыжым веле огыл, а келге илышумлымашыжым таче кече марте сайын арален коден.

Краеведений да периодика пӧлемыште «Марий кундем — шочмо-кушмо мланде!» книга ончерым вераҥдыме. Тудо Марий Элын 100 ияш лӱмгечыжлан пӧлеклалтын. Тусо шӧрлыклаште кундемнан историйже, тӱвыраже, калыкше нерген каласкалыше книга-влакым йӧнештарыме.

Почеламутым чын лудаш манын, мом ыштыман? Сай артикуляций, шындыме йӱк, каласаш шонымашым почшо движений-влак. Икманаш, актер мастарлык да  лудмо поэзий деке тӱткыш.

«Какшаныште — Стихологово» сылнымут клубын черетан вашлиймашыже Тошто У ий пайрем вашеш эртен. Пӧлеклалтын тудо почеламутым лудмо актер мастрлыклан. Актриса да педагог Любовь Михайловна Ерина да тудын тунемшышт-влак дене клубын унаже-шамыч сценический речь, артикуляций да актерский пластике нерген мутланеныт. Йоча-влак кидын пластикыжлан упражненийым ыштеныт, тӱрлӧ образым чоҥаш тыршеныт, умшасе пробко дене  писылудышым каласкаленыт да тулеч молат.

Клубын унаже-влак шканышт ятыр пайдале каҥашым налыныт. А ме  «Какшаныште — Стихологово» клубын черетан вашлиймашыжым уло кумылын вучаш тӱҥалына!

5 январьыште пӱртӱс нерген возышо кумдан палыме писатель Николай Иванович Сладковын шочмыжлан 100 ий темын. Тудо  кайыкын да янлыкын илышыж нерген возымо 60 утла книгам савыктен. Нине савыктыш-влак моткоч онай да пайдале улыт…

Шарнымаш юбилей вашеш мемнан книгагудышто «Руш чодыран йомакше» лӱман сылнымут пайрем эртен. Тушко 1-ше номеран школын 2-шо классыштыже тунемше-влак толыныт. 

Пагалыме лудшо-влак!

Тендам У ий да Рошто пайрем дене саламлена!

Паша радамыштына вашталтыш-влак дене палдарена: 

31 декабрь — санитар кече

1, 2, 3 январь — каныш кече-влак

4 да 5 январь — книгагудо 9.00 — 16.00 шагат марте ышта

6, 7, 8 январь — каныш кече-влак

9 январь гыч книгагудо ондакысе паша радам денак пашам ышта.

22 декабрь пеш оҥай кече лийын! Чылажымак ончылгоч огына каласе, а «Ийын символжо» модыш конкурсышто сеҥыше-влакым эше ик гана саламлена! Молодцы!