Кажне ийын ме тӱнямбал кӱкшытан сылнымутышто палыме писатель, поэт, драматург-влакын юбилейыштым палемдена. Юбилей ийым иктешлыме семын книгагудыштына «Юбилей шӱдырйӱр» лӱман сылнымут альманахым эртарышна. 

Шукерте огыл республикна Марий Тиште кечым палемдыш. Мемнан книгагудыштат марий тиштылан пӧлеклалтше пайрем мероприятий-влак эртеныт.  Теве Йошкар-Оласе 9-ше номеран школын тунемшышт «Книга почеш тӱням» исторический экскурсышто лийыныт.

10 декабрьыште книгагудышто палыме марий поэтесса Зоя Дудинан книга презентацийже лиеш. Книга пӧлекым тудо республикын 100 ияш юбилейже вашеш ыштен. Вашлиймаш Марий тиште кечын эрта, тушто илыш, поэзий, сылнымут нерген шонкалымаш-влак йоҥгалтыт.

Зоя Михайловна — ятыр почеламут сборникын авторжо, редактор, журналист, кусарыше, Российысе, Эстонийысе, Финляндийысе сылнымут премий-влакын лауреатше, Марий Эл Республикысе тӱвыран сулло пашаеҥже, Россий писатель ушемын еҥже. Тудын возымо эллегий, сонет, посланийже-влак айдемын кӧргӧ чон шижмашыжым келгын почыт, йӧратымаш, пиал нерген шонкалаш таратат.

Талантан поэт дене вашлийын мутланымаш 2019 ий 10 декабрьыште конференц-залыште лиеш. 

13.00 шагатлан тӱҥалеш.

Ноябрьын пытартыш рушарнянже Российыште Аван кечыжым пайремлат. Кажне айдеме йоча жап гыч тӱҥалын пытартыш кечыж марте икте да чонлан эн шерге сыным арала. Тиде — аван сынже. Ава гына мемнам умыла, проститла, чамана да нимучашдымын йӧрата…

Тиде кечын мемнан книгагудышто авалан пӧлеклалтше «Авай, йӧратыме авай» лудмаш конкурс эртен.  4 гыч 6 ияш йоча-влак ава нерген почеламут-влакым лудыныт.

Нунын выступленийыштым жюри аклен: йоча поэт, «Кокшагысе стихологово» сылнымут клубым вуйлатыше Жанна Васильевна Кулалаева, поэт, Олык Ипай лӱмеш кугыжаныш премий лауреат Никитина Надежда Геннадьевна, В. Х. Колумб лӱмеш республикысе йоча да самырык-влакын книгагудышто справочно-библиографический пӧлкам вуйлатыше Дроздовская Людмила Леонидовна.

А теве сеҥыше-влак!

I вер — Лебедева Софья, 4 ияш

II вер — Соловьев Лев, 4 ияш

III вер — Матвеева Мария, 4 ияш

Саламлена!!!

Книгагудышто икымше гана «Книга поянлыкым кычалмаште» интеллектуальный библиографический квест эртен. Тушто Йошкар-Оласе 5-ше номеран школын автономный классше участвоватлен. Ӱдыр-рвезе-влак БиБлИоТеКе лӱман поро юзо тӱняште лийыныт да поянлык шондыкым кычалыныт. Тушкыжо корно куштылго лийын огыл: чулымлык ден пырля уш поянлыкат кӱлеш улмаш. Книга кузе ышталтеш, тудым каталогышто але книга шӧрлыкыштӧ кузе муаш, мутер да справочник-шамыч дене кузе пашам ышташ — чыла тидым йоча-влаклан изиш да палыман ыле. Сылнымут герой-влак деч посна икшыве-шамычлан куштылго ок лий ыле. Нуно неле заданий годым полыш кидыштым пуэныт, финиш дек шуаш полшеныт! 

ООН-ын пунчалже почеш кажне ийын 20 ноябрьыште Йочан праважым аралыше тӱнямбал кече палемдалтеш. Тиде пайрем тӱняште илыше чыла йочан праважым аралыме йодышлан тӱткышым ойырымо дене кылдалтын. Датыжымат таклан огыл ойырымо: лач тиде кечын 1959 ийыште Генеральный Ассамблей йочан праваж шотышто  Декларацийым пеҥгыдемден, 1989 ий 20 ноябрьыште йочан праваж нерген Конвенций палемдалтын. Тиде кечын 1-ше номеран школын 4-ше классыштыже тунемше-влаклан книгагудын ончер пӧлемыштыже «Пиалан илышлан права» правовой лекторий эртен. 

Шукерте огыл «Какшаныште — Стихологово» лӱман клубын черетан погынымашыже лийын. Ме тошто да у йолташ-влак дене уэш вашлийна! Пырляште жапым веселан эртарышна: почеламутым лудна, мурым мурышна, куштышна. Тыге «Шыже рифмын семже» почеш шыже пагыт дене чеверласышна.

«Стихологовын» кумылан унаже-влак ятыр ыльыч. Нунын коклаште уста мурызо, вокал ден актер мастарлыклан туныктышо Любовь Михайловна Ерина лийын. Тудо шке уста тунемше-шамычше дене мемнам палымым ыштен. Йоча-влак пеш тургыжланеныт, вет ала-кӧжӧ икымше гана мастарлыкшым ончыктен. Каласыман, нуно чыланат шокшо кидсовышым суленыт! Изи мастар-шамыч А.Бартон да моло палыме писатель-влакын почеламутышт почеш сценкым модыныт. А эше «Пина Колада» эрвел куштымаш студийын участницыже Лилия Старшова сай куштымашыж дене куандарен. Икманаш, йӱштӧ шыже кечын весела пайремыште шокшо лийын.

Любовь Михайловна вашлиймаш нерген тыгерак ойлыш: «Тендан книгагудышто сай шӱлыш озалана, у пашалан кумылаҥда. Мыйын изи колоем кушкын шуэшат, йомак пӧлемышкыда толын, у программе дене тендам куандарена!».

«Стихологовын»  черетан вашлиймашыже декабрь тылзыште лиеш, ме тендам уло кумылын вучаш тӱҥалына!