ООН-ын пунчалже почеш кажне ийын 20 ноябрьыште Йочан праважым аралыше тӱнямбал кече палемдалтеш. Тиде пайрем тӱняште илыше чыла йочан праважым аралыме йодышлан тӱткышым ойырымо дене кылдалтын. Датыжымат таклан огыл ойырымо: лач тиде кечын 1959 ийыште Генеральный Ассамблей йочан праваж шотышто  Декларацийым пеҥгыдемден, 1989 ий 20 ноябрьыште йочан праваж нерген Конвенций палемдалтын. Тиде кечын 1-ше номеран школын 4-ше классыштыже тунемше-влаклан книгагудын ончер пӧлемыштыже «Пиалан илышлан права» правовой лекторий эртен. 

Шукерте огыл «Какшаныште — Стихологово» лӱман клубын черетан погынымашыже лийын. Ме тошто да у йолташ-влак дене уэш вашлийна! Пырляште жапым веселан эртарышна: почеламутым лудна, мурым мурышна, куштышна. Тыге «Шыже рифмын семже» почеш шыже пагыт дене чеверласышна.

«Стихологовын» кумылан унаже-влак ятыр ыльыч. Нунын коклаште уста мурызо, вокал ден актер мастарлыклан туныктышо Любовь Михайловна Ерина лийын. Тудо шке уста тунемше-шамычше дене мемнам палымым ыштен. Йоча-влак пеш тургыжланеныт, вет ала-кӧжӧ икымше гана мастарлыкшым ончыктен. Каласыман, нуно чыланат шокшо кидсовышым суленыт! Изи мастар-шамыч А.Бартон да моло палыме писатель-влакын почеламутышт почеш сценкым модыныт. А эше «Пина Колада» эрвел куштымаш студийын участницыже Лилия Старшова сай куштымашыж дене куандарен. Икманаш, йӱштӧ шыже кечын весела пайремыште шокшо лийын.

Любовь Михайловна вашлиймаш нерген тыгерак ойлыш: «Тендан книгагудышто сай шӱлыш озалана, у пашалан кумылаҥда. Мыйын изи колоем кушкын шуэшат, йомак пӧлемышкыда толын, у программе дене тендам куандарена!».

«Стихологовын»  черетан вашлиймашыже декабрь тылзыште лиеш, ме тендам уло кумылын вучаш тӱҥалына! 

Финанс грамотлык — тиде окса дене кылдалтше йодышым чын иктешлыме годым кучылталтше шинчымаш. Чаманаш кодеш, финанс грамотлыклан ни йочасадыште, ни школышто огыт туныкто… А такше тыгай тӱҥалтыш шинчымашым йочалан изиж годымак пуаш сай. Лач тыгак ыштеныт 76-шо номеран «Ручеек» йочасадын воспитанникше-влак. Нуно Рублик деке унала миен коштыныт да финанс грамотлыкын тӱҥ умлымашыж дене палыме лийыныт. 

Российыште театр ийым палемдыме вашеш да Шкетан лӱмеш марий кугыжаныш драме театрлан 100 ий темме лӱмеш 14 ноябрьыште мемнан книгагудышто Россий Федерацийын сулло артисткыже, Марий Эл Республикын калык артисткыже, Марий кугыжаныш драме театрын артисткыже Маргарита Егоровна Медикова дене вашлиймаш эрта. 

Маргарита Егоровна — мемнан республикыште веле огыл, тыгак ӧрдыж кундемысе театр тӱняште палыме айдеме. Артист дене кажне вашлиймаш — тиде шарнымаш, почеламут, муро дене пойдаралтше спектакль, а эшеже тиде айдеме деч толшо шокшо шижмаш. 

Ме театрым йӧратыше да пагалыше-влакым, тыгак Маргарита Медикован творчествыжым жаплыше еҥым «Театр — тиде мыйын илышем» лӱман вашлиймашке пагален ӱжына. 

Вашлиймаш книгагудын конференц-залыштыже лиеш. Мемнан адресна: Йошкар-Ола, Эшкинин урем,10.

14.00 шагатлан тӱҥалеш.

Марий Эл Республикын шочмо кечыж вашеш мемнан книгагудыштына «Марий кундем, шӱмлан пеш поро тый улат» почеламутым лудмо конкурс эртен. Кажне ийын тыгай конкурс мемнан дене утларак вийым налеш. Ынде нылымше гана усталык шӱлышан йоча-влак, республикнан тӱрлӧ луклаж гыч погынен, почеламут корныла гоч шочмо элым йӧратымышт нерген кумылыштым почыт. Марий поэт-влакын почеламутыштым школласе йоча-шамыч веле огыл, тыгак вузласе, техникум ден колледжласе студент-влакат шергылтареныт. А теве Помар кыдалаш школ гыч Роман Лебедев ден Верх-Ушнур кыдалаш школ гыч  Валентина Кушакова шке возымо почеламутыштым лудыныт. 

Пагалыме лудшо-влак!
 Калык-влакын икоян улмо кече дене тендам шокшын саламлена! 
 Книгагудын паша радамжым шотыш налаш йодына: 
2, 3, 4 ноябрь — каныш кече-влак.

Шочмо эл дек йӧратымашым, коча-кован илыш-йӱлажым пагалымашым, сымыктыш ден сылнымутым шымлымаш кумылым йочалан  изиж годсек шӱмаҥдыман. Книгагудышто тиде шонымаш денак тунемше-влаклан «Изэҥер» краеведений клубым чумырымо. Тушто йоча-влак шочмо кундемын историйжым, марий калык ойпогым, тӱвырам, сымыктышым да сылнымутым шымлаш тӱҥалыт.

Клубын икымше вашлиймашыже марий газет ден журнал-шамыч нерген лийын. 23-шо номеран школын 2-шо классыштыже тунемше-влаклан мемнан пашаеҥна «Кече» журнал ден «Ямде лий» газет дене палдарен. Ӱдыр-рвезе-влак икымше йоча газет ден журналын номерыштым шергалыныт, нунын историйыштым колыштыныт, мо тугай заметка, рубрика ден статья — пален налыныт. Но эн чотшо нунылан  творческий паша келшен, тудыжым уло тӱшка вий дене шуктеныт —  «Кече» журналыш икоян классышт нерген статьям возеныт.

 «Изэҥер» клубын  «Калейдоскоп событий, историй и открытий» лӱман пресс-тусовкыжо сайын эртен!