Шукерте огыл книгагудына Моско гыч уна-влакым вашлие. Мемнан деке сылнымут критик, журналист, педагог, «Книгуру» Всероссийский конкурсын экспертше  Ксения Александровна Молдавская ден писатель Ая эН (Ирина Борисовна Крестьева) толыныт.

Пресс-конференцийыште Марий Эл Республикысе тӱвыра, печать да калык-влакын пашашт шотышто министрже К.А. Иванов, министрын алмаштышыже А.Н. Луничкин, журналист ден кугыжаныш книгагудын пашаеҥышт-влак, Йошкар-Оласе туныктыш тӧнежла гыч туныктышо-шамыч лийыныт.

Ксения Молдавская ден Ая эН  йоча да самырык-влаклан эн сай произведний-влакым возымо «Книгуру» Всероссийский конкурс нерген каласкаленыт, кызытсе йоча сылнымут шотышто лекше йодыш-влаклан вашештеныт. 

Тӱнямбал музык кече вашеш мемнан книгагудышто «Айста огына чеверласе!» бард муро кас эртен. Самодеятельный мурым йӧратыше-влак В.И.Ленин лӱмеш тӱвыра полат пелен улшо «Четверг» группа дене уло кумылын вашлийыныт. Нуно шке усталыкышт дене авторский мурын уло моторлыкшым ончыктеныт. Погынышо-влак  «Многоголосье», «Музыкант» ныжыл муро-шамычым, Юрий Визборын «Речной трамвай», Булат Окуджаван «После дождичка» ден «Надежды маленький оркестрик» мурыштым колыштыныт.

Рвезе-ӱдыр ден ава-ача-влак!

Те чыланат паледа йоча книга-влакын геройыштым — шонкалыше Петсоным, ушан ой-влакым йӧратыше Федор Чӱчӱм, чапланыше Фиксикмытым, Тату ден Патум, тыгак Петя Рыжикым. Нунын нерген ятыр историйым лудында, очыни.

Шергакан йолташ-влак, те кузе шонеда, мемнан коча-кова-шамычым палыме герой-влакыш савыраш гын? Адакшым 1 октябрь – Илалше-влакын пайремышт.

Октябрь тылзе мучко Йомак пӧлемыште «Кова-коча дене пырля» лӱман книжно-иллюстративный ончерын тӱҥ геройышт-влак «супер- кова» ден «супер- коча» лийыт. Вет еш — кажне айдемын илышыштыже эн шерге да кӱлешан. 

Калык кокласе усталык кыл сылнымутым вияҥдымаште кугу пашам шукта. Ты шотышто марий сылнымутым вораҥдымаште произведений-влакым кусарымаш сомыл поснак шерге. Отечественный да тӱнямбал классикым кусарымаште марий серызе-влак ожнысек тыршеныт. Тыгак марий сылнымутымат вес йылмылашке ятыр кусарыме.  Тидын шотышто финн-угор калык-влак дене ваш келшен пашам ыштымым палемдыман. Сай пример шотеш  эстон автор-влак Арво Валтонын «Пагыт модыш» да Андрус Кивирахкын «Куд шкетой окса шумлык» книгаштым каласаш лиеш. 16 отябрьыште книгагудын конференц-залыштыже нине книга-влакын презентацийышт лиеш. Савыктыме да кусарыме пашам палыме марий поэт  Альбертина Петровна Иванова шуктен.

Вашлиймаш 13.30 шагатлан тӱҥалеш.

Книгагудыш пагален ӱжына! 

Россий — шуко йылман калык, тушто улшо 190 йылме гыч латкудытшо финн-угор йылме тӱшкаш пура. Нунын коклаште — марий йылмат. Мемнан книгагудо пашаеҥ-влак «Финн-угор калык-влак» лӱман  этнографий шагат-шамычым ямдыленыт. Нуно лудшо-влакым финн-угор т ӱшкаш пурышо калыкын историйже, тӱвыраже, илыш-йӱлаж дене палдарат. Шукерте огыл 9-ше номеран школын 11 классыштыже тунемше-влак коми ден мордва калык нерген мутланеныт.

В.Х.Колумб лӱмеш республикысе йоча да самырык-влаклан книгагудо библиотек пашаеҥ, туныктышо, мер ушемыште тыршыше-влакым «Лудаш жап!» лӱман Самырык тукымын XIV-ше лудмашышкыже ушнаш ӱжеш.

2019-ше ийын темыже – «Книга-влак йыр: лудмаш деке кумылаҥдыме у йӧн да технологий». Вашмутланымаш годым йоча ден самырык тукымым книга лудаш кумылаҥдымаште у формо да метод-влакым кучылтмо нерген ойлаш палемдыме, тыгак вашла паша опыт дене палдарымаш лиеш.

Мероприятий 2019 ий 22 октябрьыште лиеш. 10.00 шагатлан тӱҥалеш.

Самырык тукымын XIV-ше лудмашыже_Увер серыш

Самырык тукымын XIV-ше лудмашыжлан участникын йодмашыже

Идым тылзе шарнымаш кече-влаклан поян. Александр Васильевич Суворовын вуйлатыме руш войскан Альпа гоч вончымыжлан тений — 200 ий. Кокымшо антифранцузский коалиций жапысе швейцарский поход (1799-ше ий) историйыш келгын пурен кодын. Суворовын войскаже-влак 7 кугу курыкым вонченыт, тидыже курыкысо йолгорно, курыкоҥ гоч кайыме кужытшо 300 км лиеш.  Кумдан палыме тиде поход нерген  «Чапым налше» лӱман исторический экскурс Торгово-технологический колледжын тунемшышт-влаклан оҥай лийын. Тиде жап шукертак шеҥгелан кодын, но руш калыкын сар историйыштыже келге кышам коден да кугу чапым налын.