Руш писатель, сар прозын мастарже  Юрий Васильевич Бондаревын шочмыжлан 100 ий темын. Тудын йоча годсо пагытше война жапыште эртен. Тусо пагыт шочмо эл верч кредалмаште кугу йомдарымаш дене веле огыл шарнымашеш кодын, тыгак порылык, чынлык, гражданский долг нерген умылымашым вияҥден. Совет калыкын сар деч варасе подвигше, лӱддымылыкшӧ тудын  произведенийлажын негызышт лийыныт. Авторын лӱмгечыжлан «Сар прозын мастарже» книжно-иллюстративный лӱмгече-ончер пӧлеклалтын. Кушкын толшо тукымлан Ю. Бондаревын«Батальоны просят огня», «Горячий снег», «Юность командиров», «Последние залпы», «Берег» произведенийже-влакым темлыме.

Книгагудыш пагален ӱжына!

Тудлан икымше лияш пӱралтын улмаш… 9 мартыште лётчик-космонавт, Совет Союз Герой Юрий Алексеевич Гагаринын шочмыжлан 80 ий темын. 12 апрель 1961 ийыште  тудо айдеме тукымын историйыштыже пеш кугу подвигым ыштен  — икымше гана сандалыкыш чоҥештен. Таче сандалыкыш чоҥештылмаш нигӧмат утыждене ок ӧрыктаре. Туге гынат ме шонена: мыняр уш, вий, усталык кӱлыт космос кумдалыкым авалташ!  «Планетын шӱдыран эргыже» лӱмгече альманах  1961 ийысе событийым шарналташ, икымше космонавтын илыш корныжым уэш шергалаш сай йӧным ышта.

Тӱшка группылан ончылгоч возалтмаш 

Кажне калыкын поян ойпогыжо уло — йомак. муро, легенде, преданий, калыкмут да тулеч моло. Йошкар-Оласе 1-ше номеран школын нылымше классыштыже тунемше йоча-влаклан марий учёный-фольклорист Александр Ефимович Китиковлан пӧлеклалтше краеведческий фольклорный шагат эртен.

А. Китиков калыкмутым, калык пале ден тушто-влакым шымлен, тиде пашалан уло илышыжым пуэн. Савыктен лукмо книгалаштыже  5000 наре калыкмут, калык пале ден туштым муаш лиеш. Марий фольклорым 19 курым мучаште погаш тӱҥалыныт гынат, Александр Ефимовичын книгаш иктеш чумырымо сомылжо  икымше лийын.

Йоча-влак краеведын паша да усталык корныж нерген пален налыныт,  «фольклор» шомакым рашемденыт, модыш йӧрӧ туштым туштеныт, марий калыкын ойпогыж дене лишкырак палыме лийыныт. Вашлиймаш пеш пайдалын да оҥай эртен!

Шукерте огыл  «Мемнан тӱҥалтышна. Калык ойпогым лудына» акций кышкарыште «Калык-влакын тӱвырашт — элнан поянлыкше»онлайн-вашлиймаш эртен. Телемостышто В.Х. Колумб лӱмеш Республикысе йоча да самырык-влаклан  книгагудо да Удмурт Республикысе йоча да самырык-влаклан книгагудо лийыныт.

Вашла саламлалтмеке, Удмуртий гыч родо-влак  шке республикышт нерген видеороликым ончыктеныт, удмурт йылме дене почеламутым лудыныт, мурым муреныт. А эше йоча книга-влакын иллюстраторжо Екатерина Мензарипован каласкалымыже оҥай лийын.

Вара чыланат Марий Эл Республика нерген  видеоэкскурсийым онченна, Палантай лӱмеш тӱвыра да сымыктыш колледж калыкле гимназийысе 5 классыште тунемше Мария Горинова «Шочмо йылме» почеламутым лудын, книгагудысо «Колумб Pictures» мультстудийын  «Марий йылмым тунемына» цикл гыч  мультипликационный фильмже чылалан пеш келшен, «Кӱсле»  йоча образцовый ансамбль (вуйлатыше Елизавета Ивановна Васютина) марий сем-влак дене куандарен.

Телемост жапыште йоча-влак кок могырымат пеш чулым лийыныт, вашла шуко йодышым пуэденыт. Жап писын эртен каен. Тек келшымаш мурына кужу лиеш. Вес вашлиймаш марте!

Йӱштӧ телым книгагудышто шокшо Африкын помышешыже ыраш лиеш — кумшо пачашыште «Африкан континентын чияже-влак» радына ончер почылтын. Ӧрыктарыше йомак тӱня Елизавета Хорошаеван сӱретлаштыже почылтеш. Йошкар-Оласе  художественный училищын 4-ше курсыштыжо тунемше студентка шке пашаштыже африкан континентысе янлык тӱням, илыш йӱлам да йыр кумдыкым кузе ужмыжым ончыктен. Тӱрлӧ технике дене пашам ыштымыже африкан континентын шке сӧраллыкшым, моторлыкшым ончыкташ полша.

Паша-влакым ончалаш кумылда уло гын, книгагудышкына пагален ӱжына!

Ончерыште вашлиймешке !

Могай сай пайрем кечым пӧлек дене вашлияш!
Книгам пӧлеклыме тӱнямбал кечын у да тошто йолташна-влак книгагудылан оҥай, сӧрал у книга-влакым конденыт. Нуно вашке мемнан дене шке верыштым муыт!

Марий Эл Республикым Вуйлатышын полномочий представительже Татьяна Манджиевалан  ме поснак кугу таум ойлена.
Татьяна Гаряевна шке кумылын кокымшо ий  «Йӧратен пӧлеклыза книгам» Всероссийский акцийыш ушнен да мемнан книгагудылан пӧлекым ыштен.

Акцийышке икымше гана  ООО «Марикоммунэнерго» ушнен. Нунат мыланна у книга-шамычым кучыктеныт.