14 февральыште, Книгам пӧлеклыме тӱнямбал кечын, Марий Эл Республикысе тӱвыра, печать да калык-влакын пашашт шотышто министрже К.А. Иванов республикыштына «Йӧратен пӧлеклыза книгам» IV-ше Всероссийский акцийлан тӱҥалтышым пуэн. Константин Анатольевич пайрем ден саламлен да мемнан книгагудылан йочалан возымо у книга-влакым пӧлеклен. Акцийышке республикысе икмыняр тӱвыра тӧнеж ушнен, нунын вуйлатышышт книга пӧлекым шкештак конден кучыктеныт.  Ме шке коллегына-влаклан, книгагудын поро йолташыже да лудшыжо-шамычлан уло кумылын таум ойлена!

Ме йоча да кугыеҥ-влакым йолташ ден родо-влаклан книгам пӧлеклаш, библиотекыш, школыш, йоча учрежденийыш намияш йодына. Акцийыште кажныже шке кумылжым ончыктен кертеш!

Кугу Отечественный сар мемнан элын да тӱнямбалын историйшытыжат посна верым налеш. Тений ме Сеҥымашын 75 ияш лӱмгечыжым палемдена. Тиде Сеҥымаш ятыр подвиг ден йомдарымаш гоч толын. 1942 ийыште Сталинградын пырдыж воктеныже уло тӱнян пӱрымашыже шоген. Юл да Дон эҥерла коклаште ылыжше  Сталинградский кредалмаш Кугу Отечественный сарын умбакыже кузе каяш тӱҥалмыжым рашемден.

«Читая Чехова, я смеюсь, радуюсь, восхищаюсь… Вот определение таланта».
Лев Толстой

Январь тылзыште сылнымут мастар Антон Павлович Чеховын юбилейже ыле, Писатель, драматург, Императорский шанче Академийын Почетный академикшылан 160 ий темын. Тудын ойлымаш ден пьесыже-влак ынде ятыр ий лудшо еҥым сымыстарен шогат. Йошкар-Оласе аграрный колледжын студентше-влак книгагудышто тудын илышыж да творчествыж нерген шарналташ погыненыт. Могайрак лийын тудо, Антон Павлович? Могай шижмаш тудын чонжым чӱчкыдын авалтен? Молан куанен да ойгырен?

22 январьыште книгагудо пашаеҥ-влак эртыше 2019 ийысе пашам иктешленыт. Йыргешке ӱстел семын лийше вашлиймаште нуно тӱҥ сеҥымаш-влак дене пырля проблеман йодыш-влакымат радамленыт, 2020 ийыште ончыклык паша нергенат ойленыт.

Эн ончычак книгагудо директор Е. А. Ерпылёва чыла пашаеҥ-влаклан таум ойлен. Тудо палемден: кодшо ий жапыште ятыр сотрудник шке шинчымашыжым нӧлтен. Коллективын сай пашажлан кӧра таче мемнан регионышто тудо кӱшыл верым налеш.

Марий Эл Республикысе тӱвыра, печать да калыкле паша шотышто министрын алмаштышыже А. Н. Луничкин культур политикыште улшо кӱлешан йодыш-влакым нӧлталын, йоча кенигагудын кӱлешлыкшым пеҥгыдемден да Россий Президент В. В. Путинын 2020 ийысе Федеральный Собранийлан  Посланийже нерген ушештарен. 

Республикын 100 ияш лӱмгечыж вашеш ме кундемнан чапланыше сылнымутчышт-влак нерген каласкалыше «Марий Элын талант памашышт» лӱман циклым почынна. Тудын икымше унаже — поэтесса Валентина Михайдаровна Изилянова.

В. Изилянован поэзийже — пӱсӧ шижмашан, волгыдо шӱлыкан чонсавыртыш. Автор шочмо мланде, калыкше нерген чон вургыж возымо дене пырля айдемын кӧргӧ шижмашыж нергенат келгын шонкала. Лач тидын нергенак 9-ше номеран школын 10 классыштыже тунемше-влак мутланеныт. Нуно «Валентина Изилянова: чон поэзий» лӱман урокышто поэтессын илыш да творчествыж дене палыме лийыныт. 

2020-шо ийыште Марий Эл Республик 100 ияш лӱмгечыжым пайремлаш тӱҥалеш. Тидын нерген Указым  Россий Федерацийын Президентше эше 2013 ийыштак  луктын.

Марий автономный областьым 1920 ий 4 ноябрьыште ыштыме.  Марий Эл Республикын историйжат поян, тӱвыражат шкешотан, пӱртӱсшат сӧрал. Марий калык, кужу илыш корныштыжо нимогай тӧрсырым ончыде, шке муро-куштымашыжым веле огыл, а келге илышумлымашыжым таче кече марте сайын арален коден.

Краеведений да периодика пӧлемыште «Марий кундем — шочмо-кушмо мланде!» книга ончерым вераҥдыме. Тудо Марий Элын 100 ияш лӱмгечыжлан пӧлеклалтын. Тусо шӧрлыклаште кундемнан историйже, тӱвыраже, калыкше нерген каласкалыше книга-влакым йӧнештарыме.

Почеламутым чын лудаш манын, мом ыштыман? Сай артикуляций, шындыме йӱк, каласаш шонымашым почшо движений-влак. Икманаш, актер мастарлык да  лудмо поэзий деке тӱткыш.

«Какшаныште — Стихологово» сылнымут клубын черетан вашлиймашыже Тошто У ий пайрем вашеш эртен. Пӧлеклалтын тудо почеламутым лудмо актер мастрлыклан. Актриса да педагог Любовь Михайловна Ерина да тудын тунемшышт-влак дене клубын унаже-шамыч сценический речь, артикуляций да актерский пластике нерген мутланеныт. Йоча-влак кидын пластикыжлан упражненийым ыштеныт, тӱрлӧ образым чоҥаш тыршеныт, умшасе пробко дене  писылудышым каласкаленыт да тулеч молат.

Клубын унаже-влак шканышт ятыр пайдале каҥашым налыныт. А ме  «Какшаныште — Стихологово» клубын черетан вашлиймашыжым уло кумылын вучаш тӱҥалына!