Иван Алексеевич Бунинын творчествыжым кажне у тукым  шканже келшыше шӧрын гыч почеш. И. Бунин шке произведенийлаштыже айдеме тукымым курымла дене шонкалаш таратыше сюжетла дене сымыстарен, тудын почеламутшо, ойлымашыже, повестьше-влак тӱнямбал классиклан шотлалтыт.

21 январьыште  Йошкар-Оласе аграрный колледжын студентше-влак «Мутым сӱретлыше» лӱман сылнымут гостиныйыш чумыргеныт ыле.   Тудо поэт да писатель И. А. Бунинлан пӧлеклалтын. Тунемше-влак икымше руш писатель, Нобелев лӱмеш премий дене палемдалтше Бунинын илыш да творческий корныж дене палыме лийыныт.

85 ий ожно 1936 ий 3 январьыште палыме руш поэт Николай Михайлович Рубцов шочын, а 50 ий ончыч 1971 ий 19 январьыште трагически колен… Николай Рубцовым шарныме кечын кугыжаныш да муниципал служба колледжын студентше-влак «Николай Рубцов: пӱрымаш да муро-влак» музыкально-поэтический  рандевушко погыненыт. Поэтын поэзийжым да биографийжым Сергей Есенинын  творческий пӱрымашыж дене таҥастарат. Тыгаяк кӱчык, трагически кӱрылтшӧ илыш. Тыгаяк чонеш логалше, лиризм шӱлышан почеламут-влак.  Тудын произведенийже-влак кызытат калык коклаште илат. Нунын дене пырля воштылыт да шортыт. Нуным йӧратат да мурат. 

Айдемын илыш шӧрынжым сайын умылен моштымыжлан, тидымак сылнымут гоч  келгын да чын ончыктен кертмыжлан Герман Пироговым «Шып философийын поэтше» маншат лийын. Ятыр кугу проектын авторжо илышым эреак кугу тӱняончалтыш дене эскера. Тудын лывырге кумылан лирикыже тачысе пӱсӧ гражданский корнан лирика дене пырля ошкылеш.

Йолташ-влак! Тений Вильгельм Гриммын шочмыжлан 235 ий темеш. Тудо — изак-шоляк йомакче, ученый-филолог Гриммыт гыч иктыже. Нуно коктынат Германийын калык тӱвыражым пойдарымаште чот тыршеныт.

Ме тендам «Изак-шоляк Гриммытын йомак элышт» сылнымут онлайн-викторинышке  ушнаш ӱжына. Тидланже тендан шинчымашда гына огыл, тыгак изак-шолякмытын илыш-корныштым кӱлеш лийыт. 

Живописьым йӧратыше-влаклан Илья Ефимович Репинын сылнылык тӱняшкыже арт-путешествийым ышташ ӱжына. Кугу руш сӱретче кумда илыш корным эртен да пытартыш кечыж марте кистычкыж дене пырля лийын. Тудын радынаже-влак илышым йӧратыше кумылан улыт: «Бурлаки на Волге», «Иван Грозный и сын его Иван», «Царевна Софья», «Запорожцы пишут письмо турецкому султану», «Не ждали» да тулеч моло. Ме тендам сӱретчын радынаже-влакым уэш ончалаш да оҥай факт-влакым пален налаш ӱжына.