Шерге йолташ-влак!

Кугу Отечественный сарыште Сеҥымашлан  80 ий темме лӱмеш эртаралтше конкурсыш йочасадыш коштшо ийготан йоча-влакым вучена.

«Сар, тыныслык, Сеҥымаш нерген» почеламутым лудмо Республиканский конкурсыш Йошкар-Ола да Марий Эл Республикыште илыше изи ийготан йоча-влакым пагален ӱжына.

Конкурс кок ийготан категорий дене эрта:

• «4-5 ияш йоча-влак»;
• «6-7 йоча-влак»;

Конкурсышто участвоватлаш  ончылгоч  регистрацийым книгагудын сайтыштыже 2025 ий 25 апрель марте ыштыман.

Регистрироватлалтше чыла конкурсант-влак участникын сертификатшым налыт, сеҥыше-влак — дипломым да пӧлекым.

Книгагудышто «Шӱмыштӧ шарнымашым арален» йыргешке ӱстел эртен. Тудо самырык тукымым патриотизм шӱлышеш куштымо йодыш дене кылдалтын.

Тӱвыра, шанче тӧнеж, мер ушемын еҥышт Кугу Отечественный сарын да специальный военный операцийын талешкыштым шарныме пашам виктарыме шотышто шке опытышт дене палдареныт.

Йыргешке ӱстелын пашажым СВО ветеран-влак Ассоциацийын оласе пӧлкажым вуйлатыше Дмитрий Юрьевич Дубников почын. Тудын ойлымыжо шуко еҥын чонышкыжо логалын, вет тудо шкежат талешке радамыште.

Йоча да самырык-влакын шӱмыштышт элнан историйжым, шарнымашым аралаш, Руш Православный черкын сеҥымашым лишемдаш полшымыжо шотышто йодыш-влакым тарватыме. 

Марий поэт-новатор, прозаик, журналист, редактор, Марий комсомолын Олык Ипай лӱмеш премийжын икымше лауреатше  Валентин Христофорович Колумбын шочмыжлан 3 майыште 90 ий темеш. Тудын усталык пашаже марий сынымутышто каласен моштыдымо келге кышам коден. Мемнан книгагудо тудын лӱмжым кугешнен нумалеш. Поэтын лӱмгечыж вашеш   «Палыме лийына!» I-ше Республиканский дистанционный лудмо конкурс эртаралтеш.

Конкурс 2025 ий 3 март гыч 3 май марте лиеш.  

Конкурсыш Йошкар-Олаште да Марий Эл Республикыште илыше изи ийготан (6-7 ияш) йоча,  школ, гимназий да лицей гыч тунемше, кыдалаш специальностьым, кӱшыл шинчымашым налше студент-влак ушнен кертыт. 

Шочмо йылме кечылан «Шочмо верем, моторем!» йоча передачын вӱдышыжӧ-влак  В.Х. Колумб лӱмеш Республикысе йоча да самырык-влаклан книгагудышто уна лийыныт. Тушто могай книга-влак илат — айста ончалына!

Пагален ӱжына!

Йолташ-влак! 

Уремыште февраль, тугеже «Йӧратен пӧлеклыза книгам!» индешымше общероссийский акций  тӱҥалын.

 2025 ийын 10 гыч 16 февраль марте В.Х. Колумб лӱмеш йоча да самырык-влаклан книгагудо индешымше гана акцийыш ушна.  Тиде жапыште книгагудын фондшо шуко оҥай книга дене пойдаралтын.  5 000 утла  экземпляр федеральный издательство, благотворительный фонд, Марий книга савыктыш, книга кевыт, тыглай лудшын полекыштлан кӧра ешаралтын.  Теат мыланна книга пӧлекым ыштен, у савытышым пуэн кертыда.

Акцийын тӱҥ шонымашыже  – еҥ-влаклан ушештараш: книга кеч-кунамат сай пӧлек лийын да лиеш.  Тыгай пӧлекым эре вучат!  У, оҥай, мотор книгам лудмаш — кажне йочалан кугу куан.

«Пӧлеклыза йочалан книгам! Йӧратен пӧлеклыза!»

* Книгам 28 февраль марте тыгай адрес дене кондаш лиеш: 

Йошкар-Ола,  Эшкинин урем, 10. 

Книгагудын ончер пӧлемыштыже «Илыше мастарлык» сымыктыш экспозиций почылтын. Нунын авторышт — «Айвика» усталык ушемын тунемшышт да туныктышышт-влак, тыгак  Красногорскысо усталык пӧртын еҥышт.

Курчак экспозиций, мутлан, шуко шӧрынан улмыж дене ӧрыктара. Тыште  «кукла-пучымыш», «кукла-пызле», «Екатерину-санница» манмым ужаш лиеш. Кугу опытан туныктышо-влакын полшымышт дене йоча-шамыч тӱрлӧ орнаментым шке пашаштышт кучылтыт. Куклын вургемыштыже, салфеткыште улшо марий тӱр шке моторлыкшо дене кумылым савыра. Куэ кумыж гыч ыштыме корзинка, шӱнчал ате да молат мастарын ыштыме улыт.

Тыгай паша-влакым ышташ манын, йоча-шамыч руш да марий калыкын тӱвыражым шымлат,  легенде ден йомакым лудыт. Тысе паша-влак мемнам «Серебрянное копытце» да «Тулык ӱдыр Юкчи» йомакыш наҥгаят.

Самырык мастар-влакын пашаштым ончыде ида код! 

Ончер 30 апрель марте ышта. Яра пураш лиеш.

Шерге йолташ-влак!

2025 ий 9 майыште мемнан элна Кугу Отечественный сарыште сеҥымылан 80 ияш лӱмгечым кумдан палемдаш тӱҥалеш. Тиде лӱмгечылан мемнан книгагудышто «Кугу Сеҥымашын ошкылжо» Республикысе конкурс эрта. Участник-влак сӱретым сӱретлымаште але декоративно-прикладной искусство полшымо дене ыштыш-кучышым шочыктымаште таҥасат. Конкурсышко  7 гыч 14 ияш марте уста йоча-влак ушнен кертыт.

Конкурс 2025  27 январь гыч 2 июнь марте лиеш.  Паша-влак 2025 ий 20 апрель марте налалтыт.  

Паша-влак кок номинацийыште ончалтыт: «Сӱрет» да «Декоративно-прикладной творчестве».