Пагалыме лудшо-влак!

Тӱткӧ лийза,

14 декабрь гыч вес ийлан регистраций тӱҥалын.

Ушештарена, книгагудыш возалташ да регистрацийым эрташ ачан але аван паспортшо дене (копийжымат лиеш) икымше пачашсе учет секторыш толман.  Лудшын билет акше – 20 теҥге.

Шуко шочшан еш да начар тазалыкан йоча-влак регистрацийым яра налыт (кӱлеш документым ончыктыман).

Марий тиште кече — марий сылнымут дене палыме лияш сай амал. Мемнан книгагудын пашаеҥышт-влак «Кугезын йылмыже шерге мыланна» историй калейдоскопым ямдыленыт. Тудо акрет годсо марий возыктыш, икымше марла книга, кызытсе марий йылмылан кугу надырым пыштыше шанче ден просветитель-влак нерген каласкала.

Татьяна Вячеславовна Иштрикова — поэтесса, кусарыше, журналист, педагог, О. Ипай лӱмеш Марий комсомол премийын лауреатше, СССР писатель ушем еҥ. Йоча годсо жап гычак  инвалид коляскыште шинчыше ӱдыр шинчымашым налаш тыршен да шонымашкыже шуын. 2001 ий 21 февральыште Татьяна Иштрикова тиде тӱням коден каен. Но тудын ыштыме гимназийже, возымо книгаже, почеламутшо,  пьесыже, йомакше, сӱретше-влак, илышым йӧратымыже, Канде кайык нерген шонымашыже эрелан кодыныт.

Ме тыланда «Тӱрлӧ тӱсан муро» литературный караокем ончаш темлена. Тудо  поэтесса Татьяна Вячеславовна Иштрикован шочмыжлан 60 ий темме лӱмеш ышталтын.

Тыгай корныла дене тӱҥалеш Сергей Григорьевич Чавайнын «Ото» почеламутшо. Тудо марий сылнымутлан негызым пыштыше икымше произведений.

Почеламут 1905 ийыште возалтын, а икымше гана 1920 ийыште «Йошкар кече» газетеш савыкталтын. Тиде кӱчык да проста почеламутышто авторын шочмо эл, шочмо калык деке кугу йӧратымаш шыҥдаралтын. Сергей Чавайнын «Ото» почеламутшо 45 йылмыш кусаралтын да кажне йылмыж денат ик семынак сӧралын йоҥга.

Ме тыланда «Ик тымык ото уло…» лӱман видеороликым ончаш темлена. Те  почеламутым  марий, руш, татар, финн, чуваш, немыч да англичан йылмыла дене колышт кертыда.

Тений тиде почеламутын шочмыжлан 115 ий темын.

 «Марий Чодра» Калыкле парк — мемнан элыште улшо ик эн мотор вер, Марий кундемын поянлыкше. Тудын яндар ерже ден памашше, тичмаш вӱдан эҥерже, поян чодыраже кеч-кӧмат сымыстарен куандара. Калыкле паркын кумдыкшо пӱртӱс яндарлык могырымат,  историй могырымат аралыше  комплекс да объект-влакым уша.
Йошкар-Ола деч 60 километр ӧрдыжтӧ 40 гектар кумдыкышто пӱртӱсым аралыме тиде вер Элнет эҥер воктене кугу чодырам авалта. Парк лу наре ер да «Ваштар курык» дене чаплана.
Ме тыланда «Марий чодра» калыкле паркыш виртуальный экскурсийым ышташ темлена. Тушто улшо кушкыл ден янлык нерген, сӧрал пӱртӱс нерген каласкалена!

Палыдыме солдатын кечыжым Российыште шукерте огыл палемдаш тӱҥалыныт. Икымше гана тудым 2014 ийыште шарнымаш календарьыш пуртеныт. Тиддеч вара кажне ийын 3 декабрьыште элын ончыклыкше верч вуйым пыштыше да иза-шольо шӱгарлаште але колымо верыште курымешлан кийыше салтак-влакым шарныме лӱмеш урок-влак эртат. Россий Федерацийысе обороно Министерствын данныйже почеш Россий территорийыште да Йошкар Армийын кредалме вес эллаште 7,2 миллион совет воин иза-шольо шӱгарлаште кия. Нунын кокла гыч палымыже — 2,6 млн., палыдымыже — 4,6 млн.

Кугу Сеҥымашлан 75 ий темме лӱмеш идалык дене келшышын 2020 ий 3 декабрьыште элнан тунемме тӧнежлаштыже  «Тыйын лӱмет палыдыме, тыйын подвигет курымаш» всероссийский урок-влак эртат. 

 Тиде кечынак элна мучко  «Нигӧ мондалтын огыл» Всероссийский  акций эрта. Еҥ-влак «Курымашлык тул» деке толыт, пеледышым пыштен, Кугу Отечественный сарыште колышо палыдыме салтак-влакым шарналтат.