Ынде визымше ий Марий Элын шочмо кечыж вашеш мемнан книгагудышто Республиканский лудмо конкурс эртаралтеш. Тений тудо «Мый йӧратем родной элемым» маналтын да Марий Эл Республикын шочмыжлан 100 ияш лӱмгечыжлан пӧлеклалтын.
Юбилей конкурс дистанционном форматыште лийын, садлан тудо республиканский гыч регион кокласе конкурс марте кушкын.
Конкурс кок номинаций дене эртен: «Марий йылме дене поэтический произведений» да «Руш йылме дене поэтический произведений». Кажне номинацийыште кум ийгот категорий лийын. Жюри 421 пашам аклен. Нуно Марий Эл, Татарстан Республик да Моско областьла гыч лийыныт. Школлаште, профессиональный шанче тӧнежлаште тунемше, вузласе студент-влак видеоролик полшымо дене шке лудмыштым аклаш колтеныт. Нуно марий поэт-влакын шочмо кундемлан пӧлеклалтше почеламутыштым каласкаленыт, икмынярже шке возымо почеламутымат лудын.
Лудшо-влакым тиде Жюри аклен:
Петров Эрик Алексеевич – прозаик, журналист, Россий писатель ушем член, («Марий йылме дене поэтический произведений» номинацийым вуйлатыше)
Смирнов Геннадий Николаевич – поэт, Россий писатель ушем член, («Руш йылме дене поэтический произведений» номинацийым вуйлатыше).
Егошина Алина Николаевна – Марий Эл Республикын сулло артисткыже.
Иванова Елена Юрьевна – «Ямде лий» газетын журналистше.