Кажне калыкын тӱвыра поянлыкше пеш кугу. Калык йомак, преданий да легенде-влак нунын коклаште посна верым налыт. Лач нунын гоч ме калыкын шкешотан улмыжым пален налына.

А те марий йомак ден легенде-влакым паледа? Шке вийдам марий калыкын ойпогыж нерген викторине-модышышто терген кертыда. Пашада ушныжо!

Элым аралыме кече вашеш  мемнан книгагудышто «Патыр вий» салтак ринг эртен. Тушто Йошкар-Оласе 9-ше номеран школын тунемшышт-влак шке вийыштым тергеныт. Ончыклык салтак-влак армий илышын «нелытшым» шкеак шижыныт, а нунын «сарысе» йолташ ӱдырышт иквереш тунемше рвезе-шамычым лӱддымылыклан кумылаҥденыт. Самырык патыр воин-влак шке вийыштым да ушыштым тергеныт. Йоча-влак«политзанятийыште»  воинский обязанность дене палыме лийыныт, «оружийым» кучен онченыт, секретный документ-влакым кычал муыныт, солтак кухньым ужыныт. Кажне рвезе шкенжым Элым аралыше чын воин семын ужын.

Шерге лудшына-влак!

Ушештарена, пайрем кечылаште В.Х.Колумб лӱмеш Республикысе йоча да самырык-влаклан книгагудо тыгай график почеш пашам ышташ тӱҥалеш:  

20 февраль – 9.00 гыч 17.00 шагат марте

21 — 23 февраль – пайрем кече-влак, книгагудо пашам ок ыште

Умылымыланда тау, книгагудышто вашиймешке! 

Ик кугыжанышыште, ик элыште иленыт мастар-влак. Нуно мотор вургемым, модышым, атышӧрым ыштен сӧрастареныт. Тыге йыр улшо калыкым ӧрыктареныт. 29-ше номеран школын 5 классыште тунемшыже-влак «Иленыт улмаш мастар-влак» видеовернисажым уло кумылын онченыт.   

Я порою себя ощущаю связной
Между теми, кто жив
И кто отнят войной.

Юлия Друнина

Сар нерген почеламут-влак  — тиде поэзий поянлык веле огыл, эше историй поянлык. Таче, кунам Кугу Отечественный сар нерген ятыр ӱчашымашым луктыт, сар годсо поэзийын вийже икмыняр пачаш кугу, тудо — мемнан историйнан свидетельже.  Военно-патриотический воспитанийлан пӧлеклалтше месячникыште Торгово-технологический колледжын тунемшышт-влак Юлия Друнинан «Поэзием, улат окоп гыч лекше» поэзий шагатышкыже  погыненыт.

Кугу Отечественный сарын ийже-влак умбакырак да умбакырак мемнан деч каят. Кокымшо тӱнямбал сарын историйыштыже Сталинградысе кредалмаш поснак кугу верым налеш. Совет салтакын лӱддымылыкшым, патырлыкшым ончыктышо Мамаев курганысе «Героям Сталинградской битвы» памятник-ансамбль тидын нергенак ойла. Марий радиомеханический техникумын студентышт «Тушто кажныже лийын герой…» медиаэкскурсийыш толыныт да мемориальный комплекс нерген утларак пален налыныт.

Марий писатель-драматург, кусарыше Сергей Николаевич Николаевын творчестыж дене 9-ше школын 11-ше классыштыже тунемше-влак сылнымут-сылнысем шагатыште палыме лийыныт. Тудо марий драматургийышке кугу надырым пыштен. 50 ий жапыште ятыр пьесе да повестьым возен, нуно Шкетан лӱмеш марий калыкле драме театрын сценыштыже шындалтыныт. Пье­сылаштыже драматург поян эт­но­гра­фический ма­те­ри­алым кучылтын. Шке шарнымашыже-влакым С.Николаев «Го­ды твор­че­ских по­ис­ков» ме­муа­рыштыже каласкала .