Пагалыме лудшо-влак!

Тӱткӧ лийза,

1 декабрь гыч вес ийлан регистраций тӱҥалын.

Ушештарена, книгагудыш возалташ да регистрацийым эрташ ачан але аван паспортшо дене (копийжымат лиеш) икымше пачашсе учет секторыш толман.

 Лудшын билет акше – 20 теҥге.

Шуко шочшан еш да начар тазалыкан йоча-влак регистрацийым яра налыт (кӱлеш документым ончыктыман).

Тений Ленинград блокадын тӱҥалмыжлан 80 ий темын. Тиде ойган пагыт историйыште, калык шарнымаште эрелан сусыр кышам коден. Блокадан олаште кугыеҥ деч посна 400 тӱжем йоча лийын. Нунын неле пагытым чытымышт нерген ятыр сылнымут произведений каласкала. Шуко книган авторжо — блокадысе участник-шамыч, тыгак профессиональный писатель-влак. Блокадысе йоча-влак нерген возымо произведенийлан «Ленинградысе блокада — йоча книга лаштыкыште» мутланымаш пӧлеклалтын. Тушко Сергий Радонежский лӱмеш гимназий гыч йоча-влак ушененыт.

Ава – эн шерге да лишыл айдеме. Илышнан икымше кечыж гычак ме тудлан киднам шуена, тудын шокшо ӧндалтышыжым шижнена, лачак тудын дене ойго ден куаннам пайлена. Аван йӧратымашыж дене илыш тӧрсырым сеҥена. Аван тӱнямбал пайремже вашеш Йошкар-Оласе 29 номеран школын кокымшо классыштыже тунемше-влак  «Аван шыргыжмашыже» порылык урокыш толыныт ыле. 

Евгений Иванович Чарушин — палыме писатель да сӱретче. Тудын книгаж дене пырля ик тукым йоча веле огыл кушкын. Писатель-натуралистын лӱмгечыжлан ме  «Йӧратыме янлык игем-влак» сылнымут шагатым эртаренна. Тушко Йошкар-Оласе 29-ше номеран образовательный комплексыште 2-шо классыште тунемше-влак толыныт. Йоча-влак лӱмлӧ писательын илыш ден творческий корныж дене палыме лийыныт.

Тӱнямбалсе толерантность кече вешеш 12 ноябрьыште Йошкар-Оласе 29-ше номеран образовательный комплекс гыч йоча-влак «Пырля але посна» толерантность урокыш толыныт. Урокын темыже — калык кокласе кыл. Чыланат палена: тӱняште чылт икгай айдеме уке. Ме икте-весе деч тӱжвал тӱс дене, койыш-шоктыш дене ойыртемалтына.

Йолташ-влак!

Марий Эл Республикын шочмо кечыжлан пӧлеклалтше «Мый йӧратем родной элемым» Регион кокласе II-шо дистанционный лудмо конкурсым иктешлыме. Тений тушко республиксе муниципальный образованийла да Мордва республик  гыч 232 йодмаш пурен. Участник-влак жюри ончык  видеороликыш возыман поэтический произведений-влакым луктыныт. Профессионал-шамыч ойырымо произведенийын темылан келшымыжым, текстым наизусть палымым, чын ойлымым  да сценический культурым шотыш налыныт.

Марий Эл Республик — унам вашлийын моштышо кундем, канаш йӧнан, туризмлан вияҥаш сай вер. Уна-влак утларак пӱртӱсысӧ экскурсийыш кошташ йӧратат. Шнуй верлам уло кумылын ончат.

Изи да Кугу Какшан, Элнет, Юл, Кугу Кундыш эҥерла дене каналташ, йолын да имнешке, велосипед да ече дене кошташ  марий кундемыштына чыла вере йӧн уло.

Краеведений да периодика залыште лудшо-влаклан туристический маршрут-влак нерген «Марий Элыште канена» выставка-обзор уло. Тудын шӧрлыклаштыже книга, журнал, справочник, путеводитель, карта ден открытка-влак республикысе туристический маршрут-влак нерген каласкалат. Тиде тыланда оҥай гын, книгагудышто уло кумылын вучена!