Марий Эл Республик — унам вашлийын моштышо кундем, канаш йӧнан, туризмлан вияҥаш сай вер. Уна-влак утларак пӱртӱсысӧ экскурсийыш кошташ йӧратат. Шнуй верлам уло кумылын ончат.

Изи да Кугу Какшан, Элнет, Юл, Кугу Кундыш эҥерла дене каналташ, йолын да имнешке, велосипед да ече дене кошташ  марий кундемыштына чыла вере йӧн уло.

Краеведений да периодика залыште лудшо-влаклан туристический маршрут-влак нерген «Марий Элыште канена» выставка-обзор уло. Тудын шӧрлыклаштыже книга, журнал, справочник, путеводитель, карта ден открытка-влак республикысе туристический маршрут-влак нерген каласкалат. Тиде тыланда оҥай гын, книгагудышто уло кумылын вучена!

Марий Эл – тыге маныт марий-влак шке шочмо-кушмо кундемыштым.

Марий мланде чодыра да олык, эҥер да ер-влак дене поян. Кожлан моторлыкшым ончет — ончен от тем, памашын вӱдшым подылат — йӱын от тем, а пасу поянлык кинде да пакча-саска дене темын. Чодыра да олык коклаште ола ден ялла-влак верланеныт. Ял гыч ялыш, ола гыч олаш корно ден йолгорно-влак шуйналтыныт. Нуно мемнам ончыко, марий кундемнан сӧраллыкшым ончаш ӱжыт.

Марий кундемнан историйжат поян, тӱвыражат сылне, тыште кумдан палыме ятыр еҥ шочын. Марий калыкна ятыр ийла гоч шке йылмыжым, мурыжым, мотор тӱржым, юмынйӱлажым арален толын.

А те шке шочмо мландыдан историйжым, йӱлажым, тӱвыражым паледа мо? Тидланже ме тендам «Тиде мландыште илыме шуэш» этнографическо-познавательный модышыш ушнаш ӱжына.

Шыже — мотор пагыт! Шке вий  дене ончен куштымо пакча-саскам ужын, чон куана!  «Садыштат да пакчаштат» лӱман шыже пайремыш Йошкар-Оласе 29-ше номеран школысо 2-шо классыште тунемше-влак погыненыт. Йоча-влак руш калык тӱвыра дене лишкырак палыме лийыныт. Шыже пагыт нерген калык пале-шамычымат шарналтеныт.  

Финн-угор калык-влак кокласе родо-тукым кыл арняште 9-ше номеран школын кудымшо классыштыже тунемше-влак «Калык памаш-влак» лӱман вашлиймашыш толыныт ыле. Нуно  финн-угор тӱня дене лишкырак палыме лийыныт. Финно-угор тӱшкаш пурышо калык-влакын илыме кумдыкышт, тӱвырашт, историйышт нерген видеопрезентаций каласкален. Йоча-влак, тыгай мероприятийыш толын, тӱлӧ калык коклаште келшымашым утларак шижаш да аклаш тӱҥалыт.

Шерге таҥ-влак!

Кумылан-влакым «Мый йӧратем родной элемым» Регион кокласе II-шо дистанционный лудмо конкурсыш пагален ӱжына.

Тудо молгунамсе семынак Марий Эл Республикын шочмо кечыжлан пӧлеклалтеш да Марий Эл ден вес регионласе школышто тунемше, тыгак студент-влакым ушнаш ӱжеш. Тидланже Марий Эл нерген поэтический произведенийым лудман да видеороликым ыштыман  (конкурсный пашан йодмашыже Положенийыште ончыкталтын).

Конкурс 2021 ий 18 октябрь гыч 15 ноябрь марте тыгай номинаций дене шуйна (кажныже кум ийгот категорий дене):

• «Марий йылме дене поэтический произведений»;
• «Руш йылме дене поэтический произведений».

Конкурсыш паша-влак 2021 ий 3 ноябрь марте налалтыт. Участник-влак 29 октябрь марте йодмашым библиотекын сайтыштыже пуышаш улыт.

Конкурсышто сеҥыше-влак  диплом дене палемдалтыт, чыла участник-шамыч сертификатым налыт.

 Конкурс нерген в Положенийым  ончыза.

Марий писатель Яныш Ялкайнын шочмыжлан 115 ий темме вашеш мемнан книгагудышто книжно-иллюстративный ончерым ыштыме. Тудо поэт, прозаик, кусарыше, литературовед, фольклорист да этнограф Яныш Ялкайнын (Яныш Ялкаевич Ялкаев) илыш да творческий корныж нерген каласкала.

Ончерыште улшо книга-влак лудшо еҥлан пайдале улыт: теве журналист Гельсий Зайниевын Я.Ялкайн нерген каласкалыше литературоведческий статьяже-влак келге содержаниян улыт, Икымше Московский Кугыжаныш университетыште пырля тунемме йолташыже В.И.Самсоновын шарнымашыжат оҥай. Ончер шӧрлыкыштӧ  Я.Ялкайнын  руш да марий йылме дене савыкталтше произведений-влакымат муаш лиеш.

Ме кумылан-влакым краеведений да периодика пӧлкаште вучена.

Книгагудыш пагален ӱжына!

Мемнан книгагудышто уста землякна-влак дене вашлиймашым эртарымаш сай традицийыш пурен. Шукерте огыл тыгай пайрем марий поэт, МАССР-ын сулло туныктышыжо  Зинаида Васильевна Ермакова дене лийын. Вашлиймашыш Марий кугыжаныш университетын студентышт, И.С. Палантай лӱмеш тӱвыра да сымыктыш колледж пеленсе сымыктыш национальный гимназийын тунемшышт толыныт.  Амалжат пе сай — 28 сентябрьыште З.Ермаковалан 75 ий темын.