Йылме пеледышым пого,

Тудо вет ӱмырыштет

Шерге дечат шерге пого,

Эн кугу вий кидыштет!

В.Колумб

21 февральыште Тӱнямбалсе шочмо йылме кече вашеш книгагудо пашаеҥ-влак ятыр мероприятийым эртареныт.

2-шо номеран школысо 7 классыште тунемше-влак «Йылме — калыкын чонжо» дискуссий лӱҥгалтышым эртареныт. Тушто нуно тӱнясе йылмыла-влакын проблемышт нерген мутланеныт. Вет ятыр йылме йомын толеш, улшыжат лавыраҥеш да нужнаҥеш. 

21 февраль — Тӱнямбалсе  шочмо йылме кече.  Кажне калыкын шке йӱлаже, тӱвыраже, историйже уло. А эше йылмыже. Тудым аралаш — мемнан задачына. Россий – тӱрлӧ калыкым ушышо эл. Ме чыланат ик кугу еш улына.

Тиде пайрем вашеш книгагудо пашаеҥ-влак тыланда пӧлекым ыштен улыт. Ошма анимаций полшымо дене «Йома шоҥго кува ден кок ӱдыр» коми калык йомакым ончаш да колышташ темлена. Тудо «Илыше памаш» проект негызеш ышталтын.

Ончаш кумылда сай лийже!

23 февральыште Россий мучко Элым аралыше-влакын кечышт палемдалтеш. Тиде пайрем вашеш «Мемнан эллан чын служитленыт!»исторический выставка-экскурсым ыштыме. Шӧрлыкысӧ книга-влак элнам аралыше руш воин да полководец -влак дене палдарат, тиде – Дмитрий Донской, Александр Невский, Александр Суворов, Федор Ушаков. О.Н. Тихомирован «Победы русского оружия», И.И. Стрелкован «Во славу Отечества», А.В. Митяевын «Рассказы о русском флоте» да моло книга-влакат талешке-шамыч нерген ойлат. Самырык лудшо-влак талешке-шамычын Авамландым кузе арлымышт, могай сӧйлаште кредалмышт нерген пален налыт.

 1-6 класслам обслуживатлыше пӧлемыш пагален ӱжына!

2022 ий 16 февральыште В.Х.Колумб лӱмеш Республикысе йоча да самырык-влаклан книгагудышто «Книгагудо да самырык-влак: сеҥымаш, проблеме, ончыклык паша» семинар-совещаний эрташ тӱҥалеш.

Марий Эл Республикысе муниципальный книгагудо пашаеҥ-влак 2021 ийысе пашам иктешлат, ончыклык паша радамым рашемдат, шке паша опытышт дене палдарат. 

Шукерте огыл Самырык герой-анифашистын кечыжым палемдышна. Тыглай ӱдыр-рвезе-влакын вачышкышт сар жапысе нелыт возын. Но тиде неле нумалтыш нуным пеҥгыдыракым гына ыштен. Война жапыште икмыняр тӱжем утла йоча сӧй пасушто кредалын.
Тиде шарнымаш датылан «Талешке-влак илат мемнан шарнымашыште» книжно-иллюстративный ончер почылтын. 

Йолташ-влак!

Пургыж тылзе тӱҥалын, тугеже «Йӧратен пӧлеклыза книгам!»  Россий кӱкшытан акций уэш вийым налеш. Ынде кудымшо гана мемнан книгагудо тиде поро пашаш уло кумылын ушна. Тиде пайремлан тӱҥалтышым США гыч школысо библиотекарь да книга блогер  Эми Бродмур пыштен. Книгам пӧлеклыме кече 2012 ий гыч 48 элыште палемдалташ тӱҥалын. Акцийын тӱҥ шонымашыже — ушештараш: книга эреак сай пӧлек лийын кодеш. Да тиде пӧлекым моткочак вучат! У, мотор, оҥай книга — кеч-могай йочаланат куан.

Пӧлеклыза йоча-влаклан куаным — йӧратен пӧлеклыза книгам!

Таче Российысе сарзе чап кече палемдалтеш. Тудо 1943 ийысе Сталинград кредалмаште совет войскан немыч-влакым кырен шалатымыж дене кылдалтын. Сталинград кредалмаш  айдеме тукымын илышыштыже эн шучко лийын, тудо 200 кече шуйнен.

Тиде шарнымаш кече лӱмеш Сергей Алексеевын «Знаменитый дом» ойлымашыжым колышташ темлена. Надежда Викторовна Бергер лудеш.