Марий тиште кече вашеш ме тыланда сылнымут мастар-влак дене черетан вашлиймашым темлена. Ты гана вашмут-влаклан марий поэт-шамыч Алена Яковлева ден Надежда Эмыкан вашештат. Шукерте огыл нуно коктынат у книга дене куандареныт. «Тымыкын йӱкшӧ» да «Лийын тиде…» почеламут сборник-влак Финно-угор сылнымут фондын полшымышт дене лектыныт. Лишкырак те мемнан интервью деч пален налыда.

Сай кумыл дене ончалаш тыланена!

Йолташ-влак!

«#ВместеЯрче!»Республиканский дистанционный йоча сӱрет конкурс мучашлалтын. Тений почылтшо йӱклымаш дене сеҥыше-влакым палемдыме. Тидланже мемнан сайтна полшен  (Палемдыман, ик IP-адрес дене ик йӱкым гына пуаш лийын).

Теве сеҥыше-влакын лӱмышт:

I вер — Муртазина Азалина (1015 йӱк)

II вер — Мирон Евгения (781 йӱк)

III вер — Суворова Валерия (773 йӱк)

III вер — Виноградов Владислав (772 йӱк)

Саламлена!

Пӱртӱсым аралымаш теме дене кылдалтше конкурсыш ушнышо-влаклан кугу таум ойлена. Вес ганат мемнан деке ушнаш кумылда лийже!

Сеҥыше-влаклан дипломым 7 декабрь марте  

 электрон почтышкышт колтена. 

(Участник-влаклан сертификатым 

электрон почтышкышт колтена)

1 декабрь — Тӱнямбалсе СПИД ваштареш кучедалме кече. Тудо ВИЧ/СПИД эпидемийым чарен шогалтыме нерген шижтараш полша. Тиде датылан ме «Шинчымаш — лӱдмӧ ваштареш» книжно-иллюстративный увер-ончерым вераҥденна. Ончер шӧрлыкыштӧ черын вияҥ толмо историйже, тудын деч аралалтме йӧн-влак  нерген  книга да статья-влакым муаш лиеш. 

Пагалыме лудшо-влак!

Тӱткӧ лийза,

1 декабрь гыч вес ийлан регистраций тӱҥалын.

Ушештарена, книгагудыш возалташ да регистрацийым эрташ ачан але аван паспортшо дене (копийжымат лиеш) икымше пачашсе учет секторыш толман.

 Лудшын билет акше – 20 теҥге.

Шуко шочшан еш да начар тазалыкан йоча-влак регистрацийым яра налыт (кӱлеш документым ончыктыман).

Тений Ленинград блокадын тӱҥалмыжлан 80 ий темын. Тиде ойган пагыт историйыште, калык шарнымаште эрелан сусыр кышам коден. Блокадан олаште кугыеҥ деч посна 400 тӱжем йоча лийын. Нунын неле пагытым чытымышт нерген ятыр сылнымут произведений каласкала. Шуко книган авторжо — блокадысе участник-шамыч, тыгак профессиональный писатель-влак. Блокадысе йоча-влак нерген возымо произведенийлан «Ленинградысе блокада — йоча книга лаштыкыште» мутланымаш пӧлеклалтын. Тушко Сергий Радонежский лӱмеш гимназий гыч йоча-влак ушененыт.

Ава – эн шерге да лишыл айдеме. Илышнан икымше кечыж гычак ме тудлан киднам шуена, тудын шокшо ӧндалтышыжым шижнена, лачак тудын дене ойго ден куаннам пайлена. Аван йӧратымашыж дене илыш тӧрсырым сеҥена. Аван тӱнямбал пайремже вашеш Йошкар-Оласе 29 номеран школын кокымшо классыштыже тунемше-влак  «Аван шыргыжмашыже» порылык урокыш толыныт ыле. 

Евгений Иванович Чарушин — палыме писатель да сӱретче. Тудын книгаж дене пырля ик тукым йоча веле огыл кушкын. Писатель-натуралистын лӱмгечыжлан ме  «Йӧратыме янлык игем-влак» сылнымут шагатым эртаренна. Тушко Йошкар-Оласе 29-ше номеран образовательный комплексыште 2-шо классыште тунемше-влак толыныт. Йоча-влак лӱмлӧ писательын илыш ден творческий корныж дене палыме лийыныт.