3 март — писательын Тӱнямбал кечыже. Тиде амал дене «Библиорепортёр» рубрикыште писатель Валерий Владимирович Николаев дене интервью лектын. Тудо — почеламут, ойлымаш да повесть-влакын авторжо, «Сотовый мёд» поэзий книгам да Марий Элысе «Короткие встречи»руш прозо антологийым чумырышыжо. Интервьюшто Валерий Владимирович шкеж, илышыже да творчествыж нерген каласкалыш, лудмашын кӱлешлыкшым палемдыш. Ме чыла писательым профессиональный пайрем дене саламлена да сай кумылым да у сеҥымашым тыланена!

Книгагудышто  «Калык-влакын книга палитрышт» теле лудмаш фестивальым почмаш лийын. Саламлыме мутым Марий Эл Республикысе тӱвыра, печать да калык-влакын пашашт шотышто министрын алмаштышыже Николай Иванович Любимов ден книгагудын директоржо Лидия Геннадьевна Иксанова ойленыт. Тиде кечынак йоча писатель Ольга Валерьевна Кузнецова дене вашлиймаш лийын. Тудо школышто тунемше-влаклан «Когда папа рядом» у книгаж дене палдарен.

19 январь гыч 26 февраль марте Марий Элыште Российысе калык-влакын икоян улмышт идалыклан пӧлеклалтше «Книжная палитра народов» икымше теле лудмаш фестиваль эрта. Тиде фестиваль кышкарыште «Библиорепортер» цикл тале писатель, поэт да литературовед-влак дене «За строкой» блиц-интервьюм эртара. Нуно национальный литературын кӱлешлыкше да вияҥ толмыж нерген каласкалат. Циклым поэт, литературовед, кусарыше, политолог, музыкант да журналист Герман Пирогов (Георгий Прохорович Пирогов) почеш. Тудо шуко кугу проектын авторжо улеш да марий поэт-влакын почеламутыштым руш йылмыш кусарен шога. Георгий Прохорович шке шонымыжым, курымашлык поянлык нерген шонкалымыжым лудшо-влак дене пайла, вет тудын чыла тургыжланымашыже, шонкалымашыже шочмо эл да калык, тудын тачысе илышыж дене ойыраш лийдымын кылдалтын.

У ий юзо да ӧрыктарыше ю шӱлышым конда. Лач тиде кечылаште юж ойыртемалтше вий дене темеш, тудо йомак тӱняш ӱжеш. «У ий шумлык» весела пайрем кумылым да шушаш ийлан у вийым пӧлекла. Поро юзо йомак конкурс-влакым эртара, а у ий тушто-влак пайремлан эшеат весела кумылым ешарат. Рвезе-влакым оҥай модыш, усталык заданий да юзо историй-влак вучат. Пайремын эн чевер сӧрастарышыже — сескемалтше кож, тудын йыр мураш да кушташ тӱҥалына. Тиде кече кажнылан ойыртемалтше лиеш, куан кумылым пӧлекла.

Книгагудыш пагален ӱжына!

Тӱшка группылан ондак возалтман 

Марий тиште кечын книгагудышто пайремын историйжылан пӧлеклалтше «Мемнан историйыште уло лаштык» краеведений шагат лийын. Йошкар-Оласе 2-шо номеран кыдалаш общеобразовательный школ гыч тунемше-влак молан лач 10 декабрьыште марий тиште кече палемдалтмым пален налыныт, марий возыктышын шочмо историйже дене палыме лийыныт, мультимедийный презентацийын кадрыштыже марий калыкын икымше марий грамматикыжым да ондаксе текстше-влакым ужыныт. Нуно тыгак кызытсе марий йылмым вияҥдымашке кугу надырым пыштыше лӱмлӧ марий шанчызе-влак нерген пален налыныт.