Кажне ий мучаште книгагудыштына «Ийын символжо» Республиканский конкурс эрта. Теният поро юзо шӱлышан конкурснам иктешлышна. Участник-влакын пашашт молгунамсе семынак библиотекынам сылнештарат.

Конкурс кок номинаций дене эртен:

• «Кож модыш»: 20 cм деч кугу огыл сакаш лийше кеч-могай форман модыш;
• «Ийын символжо — 2025»: 20 cм деч кугу огыл сакаш лийше але 40 см кугу огыл шындаш лийше модыш Кишке.

Йоча да ава-ача-влакын пырля тыршымышт шижалтын. Гофрированный картон, пӱгыльмӧ, пластилин, фетр да моло тӱрлӧ  материал гыч ыштыме модыш-влак шинчам куандарат. Чылаже 232 модыш  йочасад, школла гыч пурен. Нуно фетр гыч ургымо, кагаз гыч ыштыме, пидме, папье-маше, аппликаций сынан але нӧнчымӧ улыт. Жюрилан сеҥышым ойыраш неле ыле.  Туге гынат тидым ыштыме. А тӱҥжӧ — йоча ден ава-ача пырля жапым пайдалын эртареныт.

Кум дипломант деч посна кажне  ийгот категорийыште да номинацийыште 20 эн сай пашам палемдыме. Нуно 2025 ий 1-ше гыч 12-шо январь марте «Выбор зрителя» йӱклымашыште участвоватлат. Тудыжо книгагудын сайтыштыже эрта. А эше «За креативность» манме номинацийыште 2 пашам палемдат.

22 декабрьыште сеҥыше да номинант-влак «Снегопых и Снегоплюх спешат на помощь» У ий театрализованный представленийыште лийыныт. Тушто нунылан диплом ден пӧлек-влакым Йӱштӧ Кугыза ден Лумӱдыр кучыктеныт. А теве конкурсышто сеҥыше-влак!

10 декабрь – Марий тиште кече. Тудо кугыжаныш пайрем, 1998 ий гыч палемдалтеш.

1775 ий 10 декабрьыште Санкт-Петербургысо книга кевытлаште «Сочинения, принадлежащие к грамматике черемисскаго языка» савыктыш лектын, авторжо — казанский архиепископ Вениамин Пуцек-Григорович.

 «Кугезе-влакын йылмышт шерге мыланна» исторический онлайн-калейдоскоп ожнысо возыктыш-влак дене палдара, икымше марий савыктыш-шамыч нерген каласкала,  кызытсе марий йылмылан вияҥаш негызым пыштыше шанче ден просветитель-влак нерген ойла. 

Марий писатель да поэт Анатолий Иванович Мокеевлан декабрь тылзыште 75 ий темеш. Тудын лӱмжӧ Марий Эыште веле огыл, пошкудо кундемлаштат сайын палыме.

Мутмастарын лӱмгечыж вашеш книгагудышто «Поэзий – эм дене иктак» книга ончерым вераҥдыме. Тушто Анатолий Мокеевын  марий да руш йылмыла дене лекше савыктышше-влакым, антологий, журнал-шамычым ужаш лиеш. Посна шӧрлык тудын илыш да творчествыж нерген каласкалыше литературлан ойырымо.  

Шергакан лудшына-влак!

Ушештарена, книгагудышто  16 декабрь гыч кажне ийын эртарыме  регистраций тӱҥалеш.

Тендам паспорт (але ава-ачан паспортшо) да  лудшын билетше дене икымше пачашыште вучена.

Регистраций – 50 теҥге.

Шуко шочшан еш, тазалык дене ойыртемалтше йоча да СВО участникын ешыже регистрацийым яра эртат  (тидланже кӱлеш документым ончыктыман).

Йолташ-влак!

Йӧратыме олана дене эрташ пагален ӱжына. Таче Йошкар-Оласе ик эн тошто урем — Яков Эшпай лӱмеш урем — дене палыме лияш ӱжына.

Сай кумылым тыланена!

Марий писатель Маргарита Ушакова — ойыртемалтше автор. Тудын произведенийже-влак илышын  тӱрлӧ шӧрынжым келгын чын ончыкташ тырша.

Тудын икымше сылнымут пашаже 1970-ше ийлаште тӱҥалын. 1978-ше ийыште «Ончыко» журналыште «Авамын куэже» ойлымашыже лудшо-влакым шкеж деке кӱлынак савырен.

Таче М. Ушакова чыла гаяк периодический изданийлаште,  «Эрвий», «Литера», «Дружба» сылнымут журналлаште савыкталтеш. Ойлымаш ден повестьлаште автор геройын чон келгытшым утларак ончыкташ тырша.

Маргарита Тимофеевна Ушакован лӱмгечыж вашеш  краеведений да периодика пӧлемыште книжно-иллюстративный ончерым чумырымо. Тудо писательын илыш ден творчествыж нерген каласкала. Ончер шӧрлыклаште «Шыже муро», «Умыло мыйым», «Авамын куэже», «Порысан пӱрымаш» книгаже-влакым ужаш лиеш.

Марий Эл Республикын шочмо кечыж лӱмеш индешымше гана «Мый йӧратем родной элемым» почеламутым лудмо конкурс эртен. Марий поэт-влакын возымыштым лудаш кумылан-влак кажне ийын шукемыт.

Тений Йошкар-Оласе да районласе школ, колледж, техникум, университетла гыч 84 тунемше шке мастарлыкшым терген. Ондаксе семынак кок номинаций лийын: «Марий йылме дене поэтический произведений» да «Руш йылме дене поэтический произведений».

Жюри артистичностьым,  выразительностьым да произведенийын конкурсын тематикыжлан шотлан толмыжым шотыш налын аклен. Жюриште лийыныт: Марий Эл Республикын сулло артисткыже А. Н. Егошина, Г. Константинов лӱмеш Руш академический драме театрын актрисыже  Л. А. Мансурова, поэтесса В. М. Гордеева, журналист-влак М. В. Оленёва, О. В. Майкова да Марий Эл Республикын сулло журанлистше В. Э. Мальцев.

Конкурсышто сеҥыше-влак:

«МАРИЙ ЙЫЛМЕ ДЕНЕ ПОЭТИЧЕСКИЙ ПРОИЗВЕДЕНИЙ» НОМИНАЦИЙЫШТЕ

 1-4 классласе ийгот категорийыште сеҥыше-влак:

I вер —  Анна Ямаева, 4 «А» класс,  И. С. Палантай лӱмеш тӱвыра да сымыктыш колледж калыкле гимназий,  (Л. Иксанова. «Йӧратыме Йошкар-Ола»);

II вер — Максим Садовин, 3 класс, МОБУ «Медведевская средняя общеобразовательная школа № 4», (Г. Матюковский. «Эсен лий, шочмо марий мланде!»);

III вер  — Драгояр Янаев,  3 класс  МОБУ «Новоарбанская средняя общеобразовательная школа»  (Медведево район), (Е. Марченкова.  «Мый кугешнем»).

5-9 классласе ийгот категорийыште сеҥыше-влак:

I вер — София Тимофеева,  7 класс,  МОУ «Средняя школа № 9 имени А. С. Пушкина»  (Волжск ола), (Е. Нестеренко. «Марий улам»);

II вер — Юлия Ягодарова,  8 класс,  МОУ «Кельмаксолинская средняя общеобразовательная школа» (Советский район), (В. Иванов. «Шочмо-кушмо верем»);

II  вер — Максим Михайлов,  5 «А» класс,  И. С. Палантай лӱмеш тӱвыра да сымыктыш колледж калыкле гимназий,  (Г. Матюковский. «Эсен лий, шочмо марий мланде!»);

III вер — Александр Мамаев,  5 «Б» класс,  МБОУ «Средняя общеобразовательная школа № 2 города Йошкар-Олы», (Н. Иванова. «Шочмо йылме»).

Кугурак классла да студент-влак кокласе ийгот категорийыште сеҥыше-влак:

I вер — Дарья Юрьева, II курс, ГБПОУ РМЭ “Марийский республиканский колледж культуры и искусств имени И. С. Палантая», (А. Полатова. «Марий Эл – чон шепка курымеш»);

II вер —  Ксения Сидорова,  ПБ 411/9 , АНПОО Колледжа Государственной и Муниципальной службы, («Марий Элем – шочмо верем»);

III вер —  Виктория Дмитриева,  СПС-11 ГБПОУ, «Марийский Лесохозяйственный техникум», (Е. Герасимов. «Марий мландат коеш тораш»).

 «РУШ ЙЫЛМЕ ДЕНЕ ПОЭТИЧЕСКИЙ ПРОИЗВЕДЕНИЙ» НОМИНАЦИЙЫШТЕ

1-4 классласе ийгот категорийыште сеҥыше-влак:

I вер — Таисия Шакирова,  1 класс, МБОУ «Общеобразовательный Комплекс «Школа № 29 города Йошкар-Олы» имени Героя Российской Федерации Д. Э. Шаймарданова, (Р. Ахматова. «Земля Мари!»);

II вер  — Артём Хаёров, 1 класс, И. С. Палантай лӱмеш тӱвыра да сымыктыш колледж калыкле гимназий, (С. Вишневский. «Марийский край»);

III вер — Давид Забродин, 2 «А» класс,  МОБУ «Знаменская средняя общеобразовательная школа» (Медведево район),  (С. Чавайн. «Последний Онар»).

5-9 классласе ийгот категорийыште сеҥыше-влак:

I  вер — Анна Феоктистова,  6 «Г» класс,  МБОУ «Средняя школа № 23 города Йошкар-Олы», (И. Феоктистова. «Марий Эл»);

II  вер —  Екатерина Васенина,  6 «А» класс,  МОУ «Звениговский лицей», ( А. Воскресенская-Лесная.  «Марий Эл»);

III  вер — Рената Шакирова, 6 «В» класс, МБОУ Образовательный комплекс «Школа № 29 города Йошкар-Олы» имени Героя Российской Федерации Д. Э. Шаймарданова, (Т. Николаева. «Марийский край»).

Кугурак классла да студент-влак кокласе ийгот категорийыште сеҥыше-влак:

I  вер — Лейла Очиева, студентка Д-11  ГБПОУ РМЭ  «Йошкар-Олинский техникум сервисных технологий», (М. Майн. «Йошкар-Ола»);

II  вер  — Маргарита Чумукова,  24 гр.,  ГБПОУ «Транспортно-энергетический техникум», (Б. Цветков. «Край Марийский»);

III  вер —  Екатерина Майкова, ЗЧС-21, ГБПОУ РМЭ «Йошкар-Олинский технологический колледж», ( А. Шурыгин.  «Марийский край»).

В. Х. Колумб лӱмеш Республикысе йоча да самырык-влаклан книгагудо чыла участник-влаклан таум ойла да умбакыжат у мастарлык кӱкшытым тылана.