Алексей Маресьевын лӱмжӧ самырык тукымлан лӱддымылыкын, героизмын примерже семын лийын кодеш. Борис Полевойын книгажлан кӧра тиде военный летчик мемнан ушышкына «чын айдемын» эталонжо семын пурен кодын. Б. Полевойын возымо повестьшын историйжым, прототипын фронтысо корныжым лишкырак пален налнеда гын, «Чын айдеме нерген повесть» подвигын летописьше дене палыме лияш темлена. Тудо летчик-истребитель Алексей Петрович Маресьевын героический чоҥештылме пагытшылан 80 ий темме лӱмеш пӧлеклалтын.

Ончылгоч возалташ телефон 34-15-12

Сеҥымашлан 77 ий темме лӱмеш мемнан книгагудышто «Кугу сарын изи геройжо-влак» шарнымаш шагат лийын, тушко 11-ше номеран йочасад гыч икшыве-влак толыныт.

Ӱдыр-рвезе-влак сар годсо йоча-влакын кугыеҥ дене тӧр пашам ыштымышт, партизан отрядыште лиймышт да подвигым ыштымышт нерген пален налыныт. Лёня Голиков, Марат Казей, Зина Портнова, Таня Савичева да моло герой-шамыч нерген ойлымашым колыштыныт. Вашлиймаш йоча-влаклан кужу жап шарнымашеш кодеш. 

Марий калыкын легендыш, историйыш кодшо ятыр талешкыже уло. Нунын кокла ик  геройжо нерген  ошма анимаций полшымо дене ыштыме «Нӧнчык патыр» марий калык йомак каласкала, тудо «Илыше памаш» проект почеш ышталтын.

Йомакыште лӱддымӧ, ушан, тале марий Нӧнчык-патырын осал тушман ден кредалмыжым ончыктымо. Ончымо жапда поро лийже!

Лӱмлӧ марий поэт Альберт Александрович Васильев шукерте огыл чапле лӱмгечыжым палемдыш. Тиде амал дене мемнан книгагудышто тудын дене вашлиймаш эртыш.

А.Васильевын ятыр йолташыже, коллегыже, землякше, студент-влак уста поэтын сылнымутшым колышташ да шкенжым саламлаш рӱж погыненыт. Альберт Александрович — икмыняр поэтический сборникын авторжо, тудын почеламутшо-влак келге философий, кумда тӱняумлымаш дене ойыртемалтыт.

Автор шке нергенжат оҥайын каласкалыш, йодыш-влакланат вашештыш. 

Шерге йолташ-влак!

Тендам кажне ийын эртаралтше «Могай сай тӱняште сар дечын посна!» Республиканский лудмо конкурсыш ушнаш ӱжына. Тудо Кугу Отечественный сарыште Сеҥымашын 77 ияш лӱмгечыжлан пӧлеклалтеш. Конкурсыш Йошкар-Оласе да Марий Эл Республикысе школышто тунемше, кыдалаш специальностьым да кӱшыл шинчымашым налше студент-влак ушнен кертыт.

Конкурс кум ийгот категорий дене эрта:

• « 1-4 класслаште тунемше-влак»;
• « 5-8класслаште тунемше-влак»;
• «9-11 класслаште тунемше да кыдалаш специальностьым ден кӱшыл шинчымашым налше студент-влак»

Конкурсышто участвоватлаш манын, 2022 ий 28 апрель марте возалтман.

Россий кумдыкышто 190 наре калык ила. Кажныжын шке йылмыже, тӱвыраже, илыш-йӱлаже. Россий калыкын тӱвыра поянлыкшылан пӧлеклалтше ийлан да Российысе калык-влакын тӱвыраштым аралыме амал дене В.Х.Колумб лӱмеш Республикысе йоча да самырык-влаклан книгагудышто «Илыше памаш» Регион-влак кокласе акций тӱҥалеш.

Акцийыш  библиотекарь, педагог-влак ушнен кертыт. Участник-шамыч видеороликым возышаш улыт (йомакым лудмаш, инсценировка, театрализованный представлений), тудо  5 гыч 15 минут марте шуйнен кертеш.

Сай паша-влакым «Илыше памаш» мультимедийный йомак коллекцийыш пуртат, тудыжым книгагудын сайтыштыже Калык фольклор кечын, 17 июльышто, ончаш лиеш.

Конкурс нерген рашрак  Увер серышыште

Шерге таҥ-влак!

Кумылан-влакым Регион-влак кокласе «Сар нерген, тыныслык нерген, Сеҥымаш нерген» II-шо дистанционный  почеламут лудмо конкурсыш ушнаш ӱжына. Тудо Кугу Отечественный сарыште Сеҥымаш кечылан пӧлеклалтеш.

Конкурсышто 4 гыч 7 ияш марте йоча-влак Марий Эл Республик да Российысе моло регионла гыч участвоватлен кертыт.

Конкурсыш Кугу Отечественный сарлан пӧлеклалтше почеламутым войзымо ик видеороликым колтыман.