Кажне профессийын шке профессиональный пайремже уло. Фантаст-влак тудым 31 июньышто палемдат.

Гарри Поттерын порылык ден осалын ваш шогымо, мыланна шагал палыме тӱняже кеч-могай ийготан йочаланат оҥай. Уло мо тӱняште айдеме, кудыжо Гарри Поттер нерген колын огыл? Кумдан палыме самырык рвезым тӱрлӧ элла гыч йоча-влак сайын палат.

9-ше номеран кыдалаш школ пелен йоча каныме лагерь гыч икшыве-влакат тудым сайын палат. Нунылан «Пагален ӱжына Хогварсыш!» ӧрыктарыше калейдоскопым ончыктымо. Тунемше-влак уло кумыл дене юзо тӱняшке «миен коштыныт», Хогвартсын историйже дене палыме лийыныт.

1941 ий 22 июнь — мемнан элнан историйыште ик эн ойган кече. Тиде кечын Германий увертарыме деч посна Советский Союз ӱмбак керылтын, тыге Кугу Отечественный сар тӱҥалын.

Шарнымаш кече вашеш книгагудышто  «22 июнь, 4 шагат…» книжно-иллюстративный ончер-реквием чумыралтын.

Ончерыште научно-популярный изданий, историк-влакын сарыште лийше событий, салтак-влакын тале кредалмашлаште илаш-колаш шогымышт, проста совет айдемын подвигше нерген шымлымашышт улыт. Посна верым С.С. Смирновын «Брестская крепость» книгаже налеш, тыгак Д. Ортенбергын «Июнь-декабрь сорок первого» документальный ойлымаш-хроникыже лудшо-влаклан пайдале лиеш. Тудо «Красная звезда» газетыште савыкталтше заметка ден очерк-влак негызеш сералтын.

Книгагудыш пагален ӱжына!  

Элна Сеҥымаш пайремым кумдан палемдыш. Тиде кече кажне айдемылан лишыл да шерге. Ме тулан шучко ий-влакым эрелан шарнышаш улына. Индешышмше май мыланна кажне гана ушештара: сар — тиде осал, кудыжо тетла лийшаш огыл.

Книгагудышто Сеҥымашлан пӧлеклалтше «Могай сай тӱняште сар дечын посна!» Республиканский лудмо конкурс кандашымше гана эртен. Самырык лудшо-влак кум категорийыште мастарлыкыштым тергеныт. Тушто В. Степановын, С. Маршакын, С. Михалковын, Р. Рождественскийын, М. Владимовын, А. Усачевын, Л. Тассин да ятыр моло поэтын почеламутышт йоҥгеныт. 

Сеҥымаш кече вашеш, 5 майыште, Российыште да тудын деч ӧрдыж кундемлаште  «Йоча-влаклан сар нерген лудына» XIV тӱнямбал акций эрта. Тудлан корным Самарысе йоча книгагудо почын. Тыгай акцийын эртымыже моткочак кӱлешан: Кугу Отечественный сар нерген тӱнямбал шарнымаш курымашлан кодшаш. 

 В.Х.Колумб лӱмеш Республикысе йоча да самырык-влаклан книгагудо тыгай акцийыш XIV гана ушна. Акций кечын Кугу Отечественный сар нерген сылнымут произведенийым йӱкын лудмаш лиеш.  5 гыч 15 ияш йоча-влаклан элнан историйыштыже лийше кугу событий-влак нерген,  шочмо элым йӧратыме кумыл нерген каласкалаш — мемнан порысна. 

2023 ий 5 майыште А. Митяевын «Пыль» (4+), С. Баруздинын «За Родину!» (7+) ойлымашыштым,  Миклай Казаковын «Пулеметчик Архипов» (12+) поэмыжым, Л. Соболевын «Соловей» (14+) ойлымашыжым комментированный лудмаш лиеш.

 34-15-12 телефон дене тӱшка группо-влак возалтын кертыт.

Книгагудыш пагален ӱжына! 

Российын историйыштыже 1943 ий Кугу Отечественный сарыште поснак ойыртемалтше лийын.  Тунамсе кредалмашлаште сарын ончыкшо кузе вияҥме корныжо рашемдалтын. Ик тыгай кредалмаш Ржев ола воктене лийын. Совет айдемын лӱддымылыкшӧ да йомдарымашын шерге акшылан кӧра олам аралыше-влак тушманлан Москвашке кокымшо гана корным кучаш пуэн огытыл. Лачак тиде кредалмашыште совет калык чын вийжым ончыктен, сеҥымашлан ӱшаным пуэн.

Тиде кредалмашыште совет солдат ден офицер-шамычын подвигыштлан «Ржев ӱмбалне турня-влак» шарнымаш шагат пӧлеклалтын. Тушко Йошкар-Оласе кугыжаныш да муниципальный службо колледжын курсантышт толыныт. 

Уста айдеме дене шинчаваш ужын мутланаш — пайрем дене иктак.  «Библиорепортер» циклнам умбакыже шуен, тыгана ме Марий Эл Республикын калык поэтше, кусарыше, журналист Геннадий Ояр (Сабанцев Геннадий Леонидович) дене вашлийна да  интервьюм возышна.

 Геннадий Леонидович шукерте огыл шке лӱмгечыжым палемден.