Кеҥеж каныш йоча-влаклан тӱрлӧ семын шуаралташ йӧным пуа, мутлан, иктаж тамле кочкышым ямдылаш жап пеш келшыше. Эр, кечывал, кас кочкыш пайрем сийыш савырнышт манын, ятыр книга полша. Моторын сӧрастарыме книга-влак «Фирменный рецепт» книжно-иллюстративный ончер-хоббиште чумыралтыныт. Кӧ тамлын да писын кочкаш шолташ тунемнеже гын,  «Кулинарная книга Чиполлино» , «Поваренная книга. Библиотечка Винни-Пуха»,  «Детская кулинария»  савыктыш-шамычым шергалын кертеш.

Лудшо-влак коклаште сайын палыме Петсон коча да тудын  Финдус пырысше тендам  когыльым, плюшкым, шӱрым, кисельым, пучымышым, эсогыл кешыр мармеладым ышташ туныктат.  Свен Нурдквистын «Готовим вместе с Петсоном и Финдусом» рецепт книгаже почеш кочкыш ямдылаш пеш куштылго. Александр Тимофеевскийын «Лучший повар — это я» книгаште рецепт-влак почеламут формо дене возалтыныт. Елена Середан «Еда мира» савыктышыже ончерыште посна верым налеш. Тушто лудшо пален налеш, мом кочкыныт кугезына-влак, ойыртемалтше сий-шамыч вес эллаште могай улыт да тулеч моло.

Кочкаш шолтымо паша компьютер модыш гаяк оҥай! Тутло кочкышым шолташ тунемза веле!

Книгагудыш пагален ӱжына!

---