15 майыште «Мый да закон» лӱман права лӱдыкшыдымылык школ «Профессий — следователь» теме дене черетан занятийым эртарен. Йошкар-Оласе 1-ше номеран школын 7 «Б» классыште тунемшышт-влак тиде профессийын шкешотан да кӱлешан улмыж нерген пален налыныт. Йоча-влак туныктымо фильмыште преступлений пашашке следовательын следственный группо дене лектын коштмо сомылжо нерген онченыт. Марий Элысе Контрольно-методический да информационно-аналитический пӧлкажын кугурак следовательже  юстиций майор Н.Ф.Файзрахманов следовательын ыштыме пашаж нерген каласкален, кудыжо фильмыште ончыктымо дечын сайынак ойыртемалтеш.

Тиде занятий Права лӱдыкшыдымылык школын «Мый да закон» программыжым иктешлыше лийын. Тиде проект Марий Элысе МВД-н да книгагудын специалистышт дене пырля ышталтын. Самырык тукым тунемме идалык жапыште мо тугай «административный ответственность», «уголовный ответственность», правам пудыртымо шотышто могай классификаций улмым пален налыныт. Тыгак самырык-влак коклаште наркоманий, илыш ден тазалыклан эҥгекым ыштыше преступлений, корно туткарыште лийше преступлений да тулеч моло темым нӧлталме. Тидланже  тӱрлӧ формым кучылтмо: лекций, интерактивный викторине, правоохранительный органлаште тыршыше специалист-влак дене вашлиймаш-влак.

«Мый да закон» Права лӱдыкшыдымылык школ шке пашажым сентябрьыште шуя, занятий-влак кажне тылзын эрташ тӱҥалыт. Кумылан-влакым уло кумылын ӱжыт, занятий-шамыч 7- 8 класслаште тунемше-влаклан келыштаралтыныт.

---