Мурет мотор — чодыра пеледыш,

Мурет вет тыйын ший аршаш…

Марий калыкын уста поэтше Олык Ипайын лӱмжӧ сылнымутыштына шӧртньӧ буква дене возалт кодын. Тений тудын шочмыжлан 105 ий темын. Мемнан книгагудын конференц-залыштыже «Марий каван пӱркытшӧ» лӱман вашлиймаш эртен. Тушко Олык Ипайын творчествыжым аклыше да пагалыше-еҥ-влак толыныт, тиде — Марий кугыжаныш университетын 1-ше курсыштыжо тунемше студент-влак ден уна-шамыч. Нунылан поэтын илыш да творчествыж нерген каласкалыше мультимедийный презентацийым темлыме ыле. 

 Марий поэт-классикын илышыште могай лиймыже нерген, тудын новатор семын кузе пашам ыштымыж нерген филологий наука кандидат, доцент Г.Н.Бояринова оҥайын каласкалыш. Олык Ипайын почеламутшым Йошкар-Оласе 7-ше номеран школын тунемшыже  Илья Прокопьев лудо.

Республикысе самырык талант-влакым кумылаҥдышашлан премий Олык Ипайын лӱмжым нумалеш. Ме кугешнена: икымше тыгай премий марий поэт Валентин Колумблан пуалтын. Кызыт тудын лӱмжым мемнан книгагудына кугешнен нумалеш. Поэзий каснан  унаже  Олык Ипай лӱмеш Марий Эл Республикысе Кугыжаныш премийын лауреатше Татьяна Соловьева ыле. Тудо шкенжын мурыжо-влакым йоҥгалтарыш, почеламутшым лудо.

  Краеведений да периодике залыште поэтын юбилейжылан пӧлеклалтше  «Олык Ипай: Чевер тӱня — кугу поэме» книга ончер пашам ыштен.

---