Кажне ийын, 1994 ий 5 ӱярня гыч тӱҥалын, Потребительын праважым аралыме тӱнямбал кече палемдалтеш. 2017 ийыште потребительский организаций-влакын Международный Федерацийже электронный коммерцийын йогынжылан тӱткышым ышташ темлен да девиз шотеш  «Consumer Rights in the Digital Age» — «Потребитель права  цифровой саманыште» — ойым налын.

15 ӱярнян книгагудышто 9-ше номеран школышто кугурак класслаште тунемше-влак дене «Кунам сату куаным ок кондо» лӱман модыш эртен.Пытартыш жапыште россиян-влак сатум чӱчкыдынак Интернет гоч налыт. Тыгай йӧн оксам аныклаш полша маныт. Интернет гоч налме сату лӱдыкшылыкым ынже лук манын, йоча-влаклан «Гид по финансовой безграмотности» книга ден «Права потребителя при приобретении товаров посредством сети Интернет» лӱман памятке каласкаленыт. Вашлиймаште «О защите прав потребителей» закон нергенат ойленыт.

Ӱярня тылзе мучко  краеведений да  периодике пӧлемыште « Потребительын азбукыжо» ончер пашам ышта. Тушто вераҥдыме литератур айдемын праважым сайын пален налаш йӧным пуа. Книгагудыш пагален ӱжына!

---