Экологий деке тӱткышым кугемдымаш — элын вияҥмаштыже ик эн кӱлешан паша. Самырык тукымым экологий проблеме деке лишемдаш манын, книгагудо Экологий ийыште шке ончыланже ятыр пашам палемден. Республикысе В.Х.Колумб лӱмеш йоча да самырык-влаклан книгагудын фондыштыжо пӱртӱс  экологий дене кылдалтше ятыр книга уло. Нуно Российыште экологический ситуацийын кузе вияҥмыж нерген, тӱрлӧ техногенный катастрофо, янлык ден кушкылын икмыняр видышт йомын кертме лӱдыкшылык нерген каласкалат. Фондышто улшо изданий-шамыч Российысе заповедник-влак дене палдарат, пӱртӱсыштӧ  лийше оҥай факт-влак нерген ойлат. Марий Элын мотор да поян пӱртӱсшӧ нерген краеведений книга-влакыште пален налаш лиеш.

Экологийын кузе вияҥмыж да вашталтмыж нерген сылнымут произведений-влак гочат ужаш лиеш. Книгагудысо пӧлкалаште  М. Пришвинын, К. Паустовскийын, В. Распутинын, В. Астафьевын возымыштым, тыгак кызытсе сылнымутым лудын, айдемын пӱртӱсым аралыме кумылжо утларак почылтеш манын ӱшанена.

Пӱртӱс тӱня дене вашлиймашке пагален ӱжына.

---