Уста айдеме дене шинчаваш ужын мутланаш — пайрем дене иктак.  «Библиорепортер» циклнам умбакыже шуен, тыгана ме Марий Эл Республикын калык поэтше, кусарыше, журналист Геннадий Ояр (Сабанцев Геннадий Леонидович) дене вашлийна да  интервьюм возышна.

 Геннадий Леонидович шукерте огыл шке лӱмгечыжым палемден.

Тудо марий да руш йылме дене возымо икмыняр книган авторжо. Почеламутшо-влак лудшын чонышкыжо шукертак корным муыныт. Вет нуно келге шонымашан да чаткан чоҥалтше улыт. Г.Оярын поэзийыштыже йӧратымаш лирика деч посна эше илыш нерген келгын шонкалымаш, айдеме ден айдеме кокласе кыл, шочмо элнан куан ден ойгыжо моткочак сайын почылтыт. Ме Геннадий Леонидовичым шочмо кечыж дене саламлена да усталык пашаштыже у деч у кӱкшытым тыланена.

Тачысе поэзийыште мо тудым тургыжландара? Книгам возымаш — тиде мастарлык але таптыме паша? Нине да моло йодышлан вашмут — мемнан «Библиорепортёрышто».

---