1 ӱярнян «Книгагудо — йочан лудмо верже»  семинар-совещаний эртен. Тушто Марий Эл Республикысе муниципальный книгагудо-влакын 2016 ийысе пашаштым иктешлыме. Вашмутланымаште йоча книгагудо-влакын, районласе тӱҥ книгагудо пӧлка-влакын паша лектышыштым да пӱсын шогышо йодыш-шамычым каҥашыме. Методист-шамыч Пӱртӱс идалыклан пӧлеклалтше мероприятий-влакым эртарыме годым кучылтмо тӱрлӧ инноваций формым темленыт. Медведево ден У  Торъял поселкысо йоча книгагудо-влакын специалистышт, Шернур тӱҥ книгагудысо йоча пӧлкан, В.Х.Колумб лӱмеш Республикысе йоча да самырык-влаклан книгагудын пашаеҥышт самырык лудшо-влакым шочмо элым йӧратыме кумыл дене воспитатлыме, йочам книга деке шӱмаҥдыме  шотышто ача-аван рольжо да ятыр моло йодышым тарватеныт, шке паша опытышт дене палдареныт. Тыгак Йоча  книга арням кузе эртарен колтымо нерген, кеҥеж каныш жапыште самырык лудшо-влак дене пашам ыштыме радамым каҥашеныт.  Тазалык дене ойыртемалтше икшыве-шамыч дене кузе пашам ыштыме йодышат ӧрдыжеш кодын огыл.

Ойлышо-влак палемденыт: мер илышыште вашталтыш-влак лийын шогат гынат, йочан уш-акылжым, чон поянлыкшым вияҥдымаште книга эн кӱлешан верым налын шога.

---