Друзья!

Уремыште — февраль, тугеже вашке   «Йӧратен пӧлеклыза книгам!» общероссийский акций тӱҥӓлтышым налеш.

2023 ий 7 гыч 14 февраль марте «Лудшым куштена» Тӱвыра, сымыктыш да просвещений деятель-влакын ассоциацийышт Российысе кугыжаныш йоча книгагудын полшымыж дене Тӱнямбалсе книгам пӧлеклыме кече вашеш «Йӧратен пӧлеклыза книгам!» общероссийский акцийым эртара. Тудо 14 февральыште лиеш. 

 Акцийын цельже – книгагудысо шӧрлыкым у книга дене пойдарымаш. Самырык лудшо-влак книгагудышто у савыктыш-шамычым налын лудын кертшаш улыт.

 Акцийын тӱҥ шонымашыже – еҥ-влаклан ушештараш: книга эрелан сай пӧлек лийын кодеш. Тиде пӧлекым чыланат пеш вучат! Мотор, у, оҥай книгам кеч-могай йоча лудаш йӧрата.

В.Х. Колумб лӱмеш Республикысе йоча да самырык-влаклан книгагудышто тиде акцийыш шымше гана ушна. Тыге 1500 экземплярлан мемнан книг шӧрлыкна пойдаратлын. Книга-влакым федеральный савыктыш, благотворительный фонд, Марий книга савыктыш, оласе книга кевыт, тыглай лудшо-влак пӧлекленыт. Тушко теат ушнен кертыда.

«Икшывылан пӧлеклыза куаным! Йӧратен пӧлеклыза книгам!»

* Книга-влакым 1 гыч 28 февраль марте тыгай адрес дене кондаш лиеш: Йошкар-Ола, Эшкинин урем, 10.

---