Пагалымаш, чытымаш, порылык, умылымаш… Тиде мут-влакын значенийыштым еҥ-влак эреак шарнышт манын, илышыштат тыгаяк лийышт манын, ятыр эллаште 16 ноябрьыште  Тӱнямбалсе толерантность кечым палемдаш ыштыме. Тидын деч меат ӧрдыжеш ышна код, «Ме еҥ коклаште илена» урок-шонкалымашым  эртарышна. Тушко 1-ше номеран школысо кокымшо классыште тунемше-влак толыныт.

Йоча-влак «толерантность» мутын значенйыштым пален нальыч, сылнымут произведенийысе герой-шамычын койышышт гоч айдемын толерантностьшо кузе почылтеш — умыленыт. Поснак поро койышлан тӱткышым ойыреныт. Йоча-влак порылыкым кузе аклыме нерген шуко мутланеныт. Тиддеч посна ваш-ваш тӱткӧ лиймаш, вашла полшымаш койыш ончыл верыште шогышаш. Йоча-шамыч, пырля погынен, «толерантность» темылан коллажым ыштеныт, тыге воктен улшо ен-влаклан поро улмышт нерген ончыктеныт.

---