Книгагудыштына уста еҥ-влак дене вашлиймаш поро йӱлаш пурен. Шукерте огыл тыгай вашлиймаш Марий Эл Республикын Калык писательже Зоя Михайловна Дудина дене лие. Шукерте огыл тудо чапле лӱмгечыжым палемдыш да тидын лӱмеш «Ошкылам шийгорно дене» усталык вашлиймашым эртарыш. Тушко поро йолташыже, поэзийым пагалыше еҥ-влак погыненыт. Нуно поэтын ятыр почеламутшым колыштыч, вашмутланымашышке ушнышт, ятыр сай шомакым ойлышт.

Тиде вашлиймашыште З.Дудинан у книгажын презентацийже лие. «Сернур – пылак уй-хир» («Сернур – шере нур») сборник чуваш йылме дене Чебоксар олаште лектын. Тудым Чуваш Республикын Калык поэтше, прозаик, драматург Раиса Васильевна Сарби кусарен. Пошкудо республике гыч уна-влак лӱмын толыныт ыле: Раиса Сарби, Альбина Юрату, Николай Шумер, Виктор Чугаров. Нуно кнеигагудыланнат ятыр книга пӧлекым ыштышт. Зоя Дудинан поэзийже нерген палыме марий шымлызе, филологий наука кандидат, доцент Николай Иванович Куторов каласкалыш. Саламлымашан мут дене Марий Элын Калык поэтше  Г.Л. Сабанцев, Марий Элын сулло журналистше-влак Л.В. Семенова, Л.Н. Григорьева да ятыр молат выступатлышт.

Муро да куштымаш пӧлекым «Чувашен»чуваш ансамбль ыштыш. Тудо Звенигово район Чуваш-Отар ял гыч толын. Пайрем моткоч сайын эртен.

Ме уло кумылын Зоя Михайловнам юбилейже дене саламлена да у сеҥымашым тыланена!

---