Лӱмлӧ марий поэт Альберт Александрович Васильев шукерте огыл чапле лӱмгечыжым палемдыш. Тиде амал дене мемнан книгагудышто тудын дене вашлиймаш эртыш.

А.Васильевын ятыр йолташыже, коллегыже, землякше, студент-влак уста поэтын сылнымутшым колышташ да шкенжым саламлаш рӱж погыненыт. Альберт Александрович — икмыняр поэтический сборникын авторжо, тудын почеламутшо-влак келге философий, кумда тӱняумлымаш дене ойыртемалтыт.

Автор шке нергенжат оҥайын каласкалыш, йодыш-влакланат вашештыш. 

Вашлиймашыш Марий Эл Республикын тӱвыра, печать да калык паша шотышто министрын алмаштышыже И.Г. Садовин, филологий наука кандидат, доцент Г.Н. Бояринова, палыме поэт-влак Зоя Дудина, Альбертина Иванова, Геннадий Смирнов да ятыр молат толыныт да поро мутым ойленыт. Пайрем мучаште А. Васильевын шомакшылан возымо муро-влакым бард-шамыч А. Яковлева ден Г. Григорьев йоҥгалтареныт.

 

 

 

---