1 февральыште палыме марий этнограф, фольклорист, краевед Т.Е. Евсеевын шочмыжлан 135 ий теме. Марий калыкын тӱвыра поянлыкшым шымлымыж дене тудо эрелан историйыш кодеш. Тимофей Евсеевич — Калыкле тоштерын икымше директоржо, шочмо вер-шӧрым кумдан шымлыше айдеме. Землякнан юбилейжылан ме «Калык тӱвырам аралыше» книжно-иллюстративный ончер-портретым ямдыленна.

Ончерысе шӧрлыкыштӧ книга ден журнал-влак Т.Е. Евсеевын илыш да творчествыж нерген каласкалат. Мутлан, «Наши земляки: пути и судьбы» книгаште историк-публицист К.Н. Сануковын очеркше Т. Евсеевын политический репрессийыш логалме жапше нерген каласкала.  «Тимофей Евсевьев: этнографические коллекции» книгаште ожнысо марий вургемын фотожо да возен кодымо текст-влакым муаш лиеш. Нуным Т.Е. Евсеев шкежак поген да возен. Тыштак Илдико Лехтиненын икымше марий этнограф да Финляндийысе Финн-угор ушем кокласе пеҥгыде кыл нерген очеркше пурталтын.

 Н.Никитинан «Новые страницы из жизни Т.Е.Евсеева» статьяже Морко район Азъял гыч родо-тукымжын шарнымашыже нерген  «Финно-угроведение» (2002, №2) журналыште воза.

Пагалыме землякна нерген кумданрак пален налнеда гын, краеведений залыш пагален ӱжына. Ончер февраль мучаш марте лиеш.

Толза книгагудыш!

---