СПИД – шучко чер. Тудо тӱнямбалне илыше чыла калыклан лӱдыкшылыкым конда. Тиде чер дечын кажне айдеме шкенжымат, лишыл еҥжымат аралышаш да тудын шарлымыжлан чаракым ыштышаш.

Тений элна мучко СПИД ваштареш кучедалме кече лӱмеш акций эртен да ик арня шуйна. Тидын годым  виш урок ден лекций-влак эртаралтыт, кинофильм-шамыч ончыкталтыт. Эмлымвер ден поликлиниклаште  анониман тестированийым яра эрташ  да специалист-влакын консультацийыштым яра налаш лиеш.

Мемнан книгагудо кажне ийын «Ончыклык — СПИД деч посна» лӱман самырык-влаклан акцийым эртара. Теният тиде кӱлешан мероприятий кугу кӱкшытыштӧ эртыш. Тушко школласе тунемше-влак, кыдалаш да кӱшыл шинчымашым налше студент-шамыч ушненыт. Акцийым эртараш молгунамсе семынак «Астрон» фитнес-клуб полшен.

Акцийын программышкыже психологын консультацийже,  чер дене кылдалтше шинчымашым тергыме online-тестирований,  видеороликым ончымаш, усталык мастерской, книга ончер-влак  да молат пуреныт. «Астрон» фитнес-клубын инструкторжо-влакын эртарыме мини-тренировкышт ӱдыр-рвезе-шамычлан поснак келшен.

 

---