Ава – эн шерге да лишыл айдеме. Илышнан икымше кечыж гычак ме тудлан киднам шуена, тудын шокшо ӧндалтышыжым шижнена, лачак тудын дене ойго ден куаннам пайлена. Аван йӧратымашыж дене илыш тӧрсырым сеҥена. Аван тӱнямбал пайремже вашеш Йошкар-Оласе 29 номеран школын кокымшо классыштыже тунемше-влак  «Аван шыргыжмашыже» порылык урокыш толыныт ыле. 

Йоча-влак Аван тӱнямбал кечыж нерген мутланеныт, тӱрлӧ эллаште тиде пайремым кузе эртарат — пален налыныт. Ӱдыр-рвезе-влак  «Северная сказка» мультфильмым онченыт, ава нерген почеламутым лудыныт да шке кид дене пӧлекым ыштеныт. Тиде вашлиймаш весела да пайрем шӱлышан лийын!

---