Республик кӱкшытан ялысе марий самырык-влакын «Эко-культур» форумышт шке пашажым 22 августышто «Олимпиец» спорт да тазаҥдыме лагерьыште тӱҥале. Тушко республикысе кажне гаяк район гыч 60 наре марий ӱдыр-рвезе ушнен.

Регистраций деч вара участник-влак ончылгоч палемдыме пӧртлаш илаш шогалыныт. Игечын шокшыжо, Яльчик ерын яндарлыкше тӱрлӧ кундем гыч толшо самырыкъеҥым вӱдыш ӱжыныт. Шер теммеш йӱштылын, жапым шуйкалыде, кугу сомыллан пижыныт.

«Ӱшан йолгорнышто» команде дене пашам ыштен кертмым тергеныт. Варажым команде кумыл Марий кугыжаныш университетын социологий да философий кафедрын туныктышыжо Л.Г.Смирнован эртарыме проблем клубыштыжо утларак пеледын. Лариса Григорьевна «эко-культур» да «этно-культур» шомак-влакын мом ончыктымыштым кызытсе илыш ойыртемым шотыш налын рашемден. Тидын годым ялысе самырыктукымын тачысе проблемыжым нӧлталын. Калык-влакын пырля келшен илыме, йылмым вияҥдыме да пӱртӱсым аралыме, экологий дене кылдалтше моло йодышат самырыкъеҥ-влакым тургыжландарен, лекций-тренинг годым шке шонымашыштым раш почын ойленыт. Тыге кажне команде темым ойырен налын, форумым петырыме кечылан социальный проектым возаш да аралаш келшен. Марий тӱвыра рӱдер вуйлатыше Н.В.Пушкинан чумырымо посна командыжат тыгай проектым возаш кумылаҥын.

«Тиде ме — тиде мый» усталык кас Юлсер ден Провой кундемлаште илыше марий калыкын муро да куштымаш усталык шондыкыштым почын. «Шайра» ден «Олык сем» фольклор ансамбль-влаклан тидым ышташ куштылго ыле: коллектив-влакын репертуарышт кумылым савырыше. Касым Христина Иванова ден Татьяна Япаева вӱденыт.

«Экокультур» форум 26 август марте шуйна.

Марий тӱвыра рӱдер сайт гыч

---