25 февральыште мемнан книгагудышто «Книгагудо – йоча лудыш рӱдер» семинар-совещаний эртен. Марий Эл Республикысе книгагудыласе вуйлатыше ден специалист-влак 2020 ийыште йоча-шамыч дене пашам ыштымышт нерген иктешлымашым ыштеныт.

Книгагудо вуйлатыше Е. А. Ерпылёва участник-влакым саламлен да палемден: книгагудо-влак 2020 ийыште COVID-19 пандемий пагытыште у йӧн дене пашам ышташ тунемыныт да шке лудшыштым арален коден кертыныт. Специалист-влакын уста пашаштым аклен, тудо умбакыжат сай паша кумылым тыланен.  

Семинар-совещанийыште 2020 ийлан тӱҥ статистический показатель-влакын анализшым ыштеныт, йоча книгагудыласе пашан кӱчык обзорышт-влакым колыштыныт.

Участник-влак самоизоляций жапыште библиотеке паша опыт дене палдареныт, онлайн-мероприятийын у форматышт, пайдале интернет-сервис нергенат мутланеныт. Кугу Отечественный сар пытымылан 75 ий да Марий Эл Республиклан 100 ий темме лӱмеш мероприятий-влакым дистанционно эртарыме пашамат сайын аклыме.

Семинар-совещанийын унаже-влак методический рекомендаций-шамыч денат палыме лийыныт. Мутлан, князь Александр Невскийын шочмыжлан 800 ий темме вашеш мероприятий-влакым эртарыме шотышто ой-каҥаш-влак йоҥгалтыныт.

Книгагудо пашаеҥ-влак информационный ресурсын пашаж дене кылдалтше йодышлам каҥашеныт. РФ Тӱвыра министерствын полшымыж дене Россий кугыжаныш йоча библиотека «Россий библиотека-влак – йоча-шамычлан» лӱман порталым ыштен, тудо элласе книгагудылаште библиотечно-информационный обслуживанийын тӱрыс данныйжым эскераш полша.

Коллега-влак тыгай вашлиймашым кӱкшын акленыт да палемденыт:  семинар-совещанийын программыже поян да пайдале лийын, а иквереш ыштыме паша — оҥай да лектышан.