Кугу Отечественный сарын ийже-влак умбакырак да умбакырак мемнан деч каят. Кокымшо тӱнямбал сарын историйыштыже Сталинградысе кредалмаш поснак кугу верым налеш. Совет салтакын лӱддымылыкшым, патырлыкшым ончыктышо Мамаев курганысе «Героям Сталинградской битвы» памятник-ансамбль тидын нергенак ойла. Марий радиомеханический техникумын студентышт «Тушто кажныже лийын герой…» медиаэкскурсийыш толыныт да мемориальный комплекс нерген утларак пален налыныт. Нуно шаланыше пырдыжыште тале кредалмашым ончыктышо Тополь аллей дене каеныт,  аллей кӧргыштыжӧ сем йоҥген да Левитанын йӱкшӧ шоктен. Умбакыже йоча-влак   «Площадь героев» лӱман верым эртеныт, Воин чап залышке шуыныт. Тушто идалыкын кеч-могай жапыштыжат Почетный караул шога да Курымашлык тул йӱла. «Скорбь матери» скульптурный композиций йоча-влаклан поснак шарнымашеш кодын. Гранитан 200 тошкалтыш «Родина-мать зовет!» скульптур деке наҥгая. Тудо мемориальный комплексын рӱдыжӧ. Тунемше-влаклан Мамаев курганысе памятник-ансамблей келге кышам коден да шке эл верч кугешнымаш кумылым луктын.

---