«Вучо мыйым» — Кугу Отечественный сар годым  тиде почеламутын корнылажым кид дене возен, совет солдат ден офицер-влак икте-весыштлан пуэденыт. Константин Симонов тудым 1941 ийыште Могилёв ола воктен колымаш гыч утаралтме деч вара возен. Тудын фронтовой почеламут, очерк ден пьесыже-влак совет воин-влаклан кредалмаше, а нунын ешыштлан шерге айдемым сар гыч вучен шукташ вийым ешареныт. Поэт, прозаик, публицист, сценарист, Социалистический Паша Герой Константин Михайлович Симоновын шочмыжлан 105 ий темме вашеш  «Шке жапын еҥже» книжно-иллюстративный ончер-портретым вераҥдыме.

Литераторын илышыже, фронтовой корныжо, сар деч варасе жапше нерген да творчествыж нерген «Константин Симонов – вблизи и на расстоянии», «Сквозь огонь и стужу, мы прошли…» ужашла гыч палаш лиеш. Лудшо еҥ К.Симоновын почеламут, поэме, очерк, повесть, ойлымаш, «Живые и мертвые» да«Так называемая личная жизнь» романже-влак дене, «Сегодня и давно» шарнымаш да статья дене,  «Разные дни войны» писательын дневникше дене палыме лийын кертеш.

---