Права лӱдыкшыдымылык школын «Мый да закон» черетан погынымашыштыже йоча-влак Марий Эл Республикысе МВД-н экспертно-криминалистический рӱдержын специалистше-шамыч дене вашлийыныт. 28-ше номеран лицейын 8-ше классыштыже тунемше-влак криминалистический экспертизын ышталтме историйже нерген, тыгак кызытсе правоохранительный пашаште тудын рольжо могай — пален налыныт.
Эксперт-криминалист И. В. Лаврентьев ден Р. Г. Акатов йоча-влаклан происшествий лийме верым ончымаште, показанийым тергымаште криминалистический экспертизын кӱлешан пашаж нерген ойленыт. Эксперт-криминалист-влакын пашашт следствий годым осал пашан кузе ышталтмыжым рашемдаш полша. Тунемше-влаклан поснак эксперт-криминалистын паша чемоданысе комплектым ужаш оҥай лийын.
