ООН-ын пунчалже почеш кажне ийын 20 ноябрьыште Йочан праважым аралыше тӱнямбал кече палемдалтеш. Тиде пайрем тӱняште илыше чыла йочан праважым аралыме йодышлан тӱткышым ойырымо дене кылдалтын. Датыжымат таклан огыл ойырымо: лач тиде кечын 1959 ийыште Генеральный Ассамблей йочан праваж шотышто  Декларацийым пеҥгыдемден, 1989 ий 20 ноябрьыште йочан праваж нерген Конвенций палемдалтын. Тиде кечын 1-ше номеран школын 4-ше классыштыже тунемше-влаклан книгагудын ончер пӧлемыштыже «Пиалан илышлан права» правовой лекторий эртен. 

Йоча-влак «права» манмым кузе умылымышт нерген ойленыт, пайремын шочмыж нерген пален налыныт. А эше Конвенцийыште возымо, Декларацийыште да Россий Федерацийын Конституцийыштыже палемдыме йоча права-влакым шымленыт. Тунемше-шамыч мутланымашкат кумылын ушненыт. Мутлан, сылнымут герой иктаж ситуацийыш логалын да тыгодым тудын праваже пудыртымо лийын гын, йоча-влак шонымашыштым темленыт, чын вашмутым кычалыныт. Тиде вашлиймаш гоч умыленыт: йоча-влак шке правашт нерген палышаш веле огыл, тудым аралаш тунемшаш улыт, тыгак вес еҥын праважымат шотлышаш улыт.

 

---