Вашке тунемше-влакын весела пагытышт — кеҥеж каныш — шуэш. Шокшо игече, шуко яра жап йолташ-влак дене вашлияш, чодыра ден эҥерлашке кошташ йӧным ыштат. Но шарныман: каныш пайдале веле огыл, тыгак лӱдыкшыдымӧ лийшаш. Тыгай шонымаш дене книгагудышто 9-ше номеран  школысо 7- ше классыште тунемше-влак дене «Тендан деч ойго кораҥже манын» лӱман интерактивный мутланымаш эртен. Йоча-влак  МВД да МЧС-ын специалистышт-влакын ыштыме лӱдыкшыдымылык правилышт нерген кутыреныт.Тунемше-влак спорт занятий годым, ола пайремлаште, уремыште лийме годым, кӱдырчан да мардежан игече годым шкемым кузе кучыман — пален налыныт. Тыгак чоҥалтше але шуэн кодымо объектлаште кошташ чарыме нергенат мутланеныт.

Всероссийский общественный молодежный организаций пеленсе Марий региональный отделенийын еҥышт-влак  В. Чикулаева и А. Павлова («Всероссийский студенческий корпус спасателей») йоча-влаклан чодырасе  пожар лӱдыкшӧ, вӱдысӧ лӱдыкшӧ нерген ушештареныт, туткар годым шкемым кидыш налаш, а вара полышым йодын 112 номерыш йыҥгырташ манын ойленыт.

Шинчымашым пеҥгыдемдыме семын,  илыш туткар годым кузе шкемым кучаш, икымше полышым кузе пуаш —  йоча-влаклан «модын» ончыктымо.

 

 

---