Михаил Юрьевич Лермонтовын лӱмжӧ руш сылнымутышто кумдан чапланыше поэт ден писатель-влакын лӱмышт коклаште ик эн ончыл верым налеш да  тӱнямбал кӱкшытан сылнымутышто кумда верым айла.  Лермонтовын поэтический шӱдыржӧ  тачат чолган йӱла. Тидым эше ик гана пеҥгыдемдышт Йошкар-Оласе 9-ше номеран школын 9-ше классыштыже тунемше-влак. Нуно «Руш чонан корныеҥ» сылнымут гостиныйыште уна лийыныт, поэт да писательын кӱкшӧ творчествыжым аклен, поэтический корнылажым лудыныт. Тунемше-влак эше тидымат пален налыныт: Лермонтов кугу поэт ден прозаик веле огыл, тыгак сай сӱретче лийын, скрипка да фортепьяно дене сай шоктен, мурен, шке почеламутшылан семым возен, икмыняр йот йылмым пален.Тунемше-влак Лермонтовын йолташыже-влакшын шарнымашышт дене палыме лийыныт, поэтын шкенжын да ешыжын тӱрлӧ ийлаште ыштыме фотосӱретше-влакым онченыт. Уна-влак тыгак руш актер-влакын почеламут лудмыштым, Анна Германын йоҥгалтарыме «Выхожу один я на дорогу» романсым колыштыныт. Мучашлан йоча-влак кугу поэтын портретше воктен шарнымаш фотом ыштеныт.

---