Кунам «руш пӱртӱсын поэзийже» нерген мут лектеш, ме эн ондак Исаак Ильич Левитанын лӱмжым шарналтена. Шке кӱчык ӱмырыштыжӧ тудо шуко жапым руш пӱртӱсым сӱретлаш ойырен. Тудым мотор пасу ден олык, эҥер ден ер, изи ото-влак сымыстареныт. Йошкар-Оласе 9-ше номеран школын 3-шо классыштыже тунемше йоча-влакым чынжымак кугу пӧлек вучен: нуно кумдан палыме руш сӱретче Исаак Левитанын радынаже-влак почеш ӧрыктарыше путешествийыш лектыныт. Тунемше-влак чодыраште, олыкышто, эҥер воктене лийыныт. «Сымыстараше руш пӱртӱс» лӱман мультимедийный микст уна-влаклан руш пейзажистын кумылжым, тудын ойго ден куанжым почын пуаш полшен.  Тунемше-влак мастарын «Март», «Весна. Большая вода», «Березовая роща», «Золотая осень» да моло радынаже-влак дене палыме лийыныт. Шукынжо ойленыт, йыр улшо пӱртӱсым нуно кажне кечын гаяк ужыт, но моторлыкшым эрежак шекланен огытыл. Левитанын сӱретше-влакым йоча-шамыч пеш тӱткын онченыт, кажне детальжым шымлаш тыршеныт, а вет сӱретче тӱҥ шотышто кок-кум тӱҥ чиям веле кучылтын. Сӱретчын репродукцийжым ончымо годым поэт-влак К.Чолиевын, Ф.Тютчевын, А.Прокофьевын, И.Бунинын поэзийышт, П.Чайковскийын семже йоҥген. Левитанын радынаже-влакым ончымек, тунемше-влак шкештат уло кумылын «Шыже мардеж» лӱман шке пейзажыштым аппликаций технике дене ыштеныт…

---