Ынде ятыр тукым Александр Сергеевич Пушкинын ужар тумысо шинчырже, тусо шанче пырыс нерген йомакшым колыштын да лудын кушкеш. Поэтын йомак тӱнясе патырже, осал ден поро волшебникше-влак кызытат изи падырашымат, кугыеҥымат сымыстарат. Пушкинын ӧрыктарыше сюжетше-влак, тусо мут-влакын муро гай йоҥгалтмышт ятыр уста композитор-влаклан мотор произведений-шамычым шочыкташ полшеныт. Лач тидын нергенак 9-ше номеран кыдалаш школысо 4-ше классыште тунемше-влак мутланеныт.  

Ондак  тунемше-влак пален налыныт, мо тугай опера, тудо драматический спектакль деч мо дене ойыртемалтеш, але мо тугай «либретто», «ария». А вара йоча-влак Пушкинын возымо  поэтический преданийлаж негызеш М.И. Глинкан да Н.А. Римский-Корсаковын возымо пашашт дене палыме лийыныт, композитор-шамычын оперный произведенийлашт гыч ужашым колыштыныт. Юзо тӱняш наҥгайыше сем тунемше-влаклан лӱддымӧ  Руслан ден мотор Людмила нерген, осал волшебник Черномор нерген каласкален. Ӱдыр-рвезе-влак тыгак «Царь Салтан нерген йомак» гыч ужашым колыштыныт, юзо урым, патыр-влакым да Йӱксӧ ӱдырым уэш шарналтеныт, сем полшымо дене оҥай да вийдыме Дадон царь ден мотор Шамахан царицым ушыштышт сӱретленыт. Йомак тӱняшке оҥай путешествийым ыштымек,  йоча-влак иктешлымашым ыштеныт: Александр Сергеевич Пушкинын юзо преданийже-влак сем аланыштат шке моторлыкыштым йомдарен огытыл.

---