Кажне калыкын тӱвыраштыже национальный вургем ик эн тӱҥ верым налын шога да вияҥ толшо кужу корныжым ончыкта. Калык вургемыште — мемнан вожна, уш-акылна, аралтыш вийна. «Марий вургемын поэзийже» этномозаике 29-ше номеран школын 7-ше классыштыже тунемше-влаклан марий калыкын поян вургемже нерген моткоч оҥай каласкален, вет вургем шке озаж нерген шуко каласкален кертеш: тудын ешыж нерген, ийготшо, пашам йӧратымыже да шуко моло нергенат. Йоча-влак пален налыныт, кузе пагыт эртыме дене марий вургемын южо элементше вашталт толын, а южыжо таче кече мартеат аралалтын. Тунемше-влаклан марий тӱр нергенат ятыр каласкаленыт. Вет тӱрыштӧ  моткоч шуко тамга, пале аралтыш семын улыт. Йоча-влаклан презентаций деч посна эше марий тувырым ончыктеныт. Ӱдыр-рвезе-шамыч тувыр-шовырым ужын веле огыл, кученак ончен кертыныт.

---