Родо-тукым калык-влакын кечышт финн-угор тӱняште ик эн тӱҥ пайремлан шотлалтеш. Пайрем историйын вожшо торасе кодшо курымыш кая. Икымше гана финно-угор-влакын кечыштым 1928 ий 28 февральыште палемденыт. Лач тунамак Финляндийыште Калевалан кечыже эртен. Ик ий эртымек, тыгай кече вашеш Эстонийыште мероприятий-влак лийыныт. 1931 ийыште финн-угор тӱвыран IV Конгрессше годым Эстонийыште, Финляндийыште да Венгрийыште кажне ийын октябрьын кумшо арняштыже палемдаш пунчалме. 1991 ий гыч нине калык-влак деке Российыште илыше калык-шамычат ушненыт. Пытартыш лу ий жапыште нине Кече-влак финн-угор калык-шамычым ушышо символ семын палемдалтыт, нунын тӱвыраштым, сымыктышыштым пойдараш амалым ыштат.

19 октябрьыште тиде Кече вашеш мемнан книгагудышто  «Йолташ-влак коклаште» этнографий мозаика эртен. 9-ше номеран школын 5 классыштыже тунемше-шамыч финн-угор калык-влак нерген каласкалыше мультимедийный презентаций дене палыме лийыныт, нунын илыш-йӱлашт нерген видеосюжетлам онченыт. Кӧ тугай лопарь-влак улыт, сету калык ожно мом ыштен, молан лив-влак 400 еҥ гына кодыныт — чыла тидым палаш йоча-влаклан оҥай ыле. Кажне финн-угор калык, мари, коми але карел, шке илыш йыжыҥже дене моло деч  ойыртемалтеш, посна йӱкан улеш.

 

---