Мемнан книгагудышто Марий Эл Республикын шочмо кечыжлан пӧлеклалтше «Чодыран, ший вӱдан кундемна!» почеламутым лудмо конкурс эртен. Ынде кумшо ий книгапӧртышкына талантан икшыве-влак шочмо кундемна нерген марий поэт-писатель-влакын возымо  сылнымутыштым лудаш погынат. Республикынан пайремже калыкнан икоян, келшен илымыжым ончыкта. Мотор пӱртӱсна, ныжыл йылмына, поян тӱвырана деке йӧратымашым почеламут корныла гоч почын пуаш — конкурсын тӱҥ шонымашыже.

Конкурсышто 43 участник вийжым терген. Нуно Йошкар-Ола, Морко, Мари-Турек, У Торъял, Шернур районла гыч толыныт. Чыланат моткоч сай ямдылалтыныт. Йоча-шамыч кум тӱшкалан шелалтыныт ыле: изирак, кыдалаш да кугурак ийготан тунемше-влак. Икшыве-влакын усталыкыштым профессиональный жюри аклен: поэт да писатель-влак А.А.Подольский, Г.Л. Сабанцев, А.А. Веселов, Ж.В. Кулалаева, журналист-влак Л.Н. Григорьева, Е.Ю. Моисеева. Конкурсант-влак кок номинацийыште таҥасеныт: «Почеламутым марла лудмаш» да «Почеламутым рушла лудмаш».

Сеҥыше-влакын лӱмышт:

«Почеламутым марла лудмаш» номинацийыште

 1-4 класс-влак коклаште — Тимофеева Татьяна, 2-шо номеран Морко кыдалаш школын тунемшыже ( С.Г. Чавайн. «Марий область совет-влакын первый погынымашыштлан»);

5-9 класс-влак коклаште — Романова Ульяна, Калыкле президентский школ-интернатын тунемшыже (В. Дмитриев. «Саламлем, шочмо-кушмо кундем!»);

кугурак классла да студент-влак коклаште — Ефимова Элла, 6-шо номеран Морко кыдалаш школын тунемшыже ( Ким Васин. «Муро апшат» книга гыч «Тӱҥалтыш кыша» ужаш).

«Почеламутым рушла лудмаш» номинацийыште

1-4 класс-влак коклаште — Казанкина Дарья, Йошкар-Оласе 28-ше номеран лицейын тунемшыже ( Осмин Йыван. «Родина»,  Эзра Левонтин кусарен);

5-9 класс-влак коклаште —Калинина Анастасия, Йошкар-Оласе 6-шо номеран школын тунемшыже ( С. Вишневский. «Марийский край»);

кугурак классла да студент-влак коклаште — Иванова Анастасия, Йошкар-Оласе 23-шо номеран школын тунемшыже ( С.Г. Чавайн. «Пора цветения»).

Сеҥыше-влакым уло кумылын саламлена!

 Конкурсын чыла участникше-влаклан у сеҥымашым тыланена! 

Тыгак ончо: «Чодыран, ший вӱдан кундемна» галерей

---