Марий Эл Республикысе Олык Ипай лӱмеш кугыжаныш самырыктукым премийлан тений 50 ий. Тыгай премий сылнымут, тӱвыра да сымыктыш аланыште  тыршыше еҥ-влаклан пуалтеш. 1968 ийыште, комсомоллан 50 ий темме жапыште, ВЛКСМ Марий обком республикысе самырык талант-влакым кумылаҥдымашлан премийым ышташ да тудлан Олык Ипайын лӱмжым пуаш палемденыт.

Олык Ипай – марий калыкын уста поэтше. Тудын лӱмжӧ шочмо сылнымутышкына шӧртньӧ буква дене возалт кодын. Тудо кӱчык ӱмырым – 25 ийым — гына илен. Но илыме курымыштыжо моткоч шуко пашам ыштен коден: 10 ияшак икымше почеламутым возен, 16 ияш сылнымутыш пеҥгыдын шогалын, 20 ияш писатель ушемыш пурен. 10 ий жапыште 10 поэмым, 2 йомакым, ятыр почеламутым, ойлымаш ден очерк-влакым серен, шуко кусарыме пашам шуктен.

Олык Ипай лӱмеш лауреат лӱмым эн ондак комозитор Эрик Сапаев да поэт Валентин Колумб налыныт. В.Колумблан тиде лӱмым «Эре чоҥешташ, чоҥешташ» почеламут сборникшылан да «Абакан – Тайшет» кӱртньыгорным  ыштыме нерген «Келшымаш ола» очерк книгажлан пуымо. А композитор Э.Сапаев  ятыр мурын да «Акпатыр» икымше марий оперын авторжо семын историеш кодын.

1994 ийыште премий «кугыжаныш» манме премийыш савырнен. 2008 ий гыч лауреат-влаклан диплом дене пырля у оҥпалым – медальым – пуаш тӱҥалыныт. 50 ий жапыште ятыр сӱретче, семмастар, мурызо, писатель ден поэт тыгай лӱмым сулен. Нунын коклаште поэт-влак С.Николаев, А.Иванова, А.Тимиркаев, артист-влак Г.Иванова-Ямаева, И.Смирнов, И. Актуганов, сӱретче-влак З.Лаврентьев, М.Клюкина, О.Боголюбов да молат. Марий кугыжаныш университетын да И.С. Палантай лӱмеш тӱвыра да сымыктыш колледжын студентышт-влак дене вашлиймашыш Олык Ипай лӱмеш кугыжаныш премийын лауреатше-влак мурызо, поэт Татьяна Соловьева ден Марий самырык театрын актрисыже, мурызо Любовь Купсольцева толыныт.

Т. Соловьева – икмыняр книган авторжо, финно-угор писатель-влакын X Тӱнямбал конгрессшын участницыже. Татьяна тунемше-влаклан шке творчествыж нерген каласкалыш, мурым гитар почеш муралтыш.

Марий самырык театрын актрисыже, Марий Эл Республикын сулло артисткыже Л.Купсольцева калык пагалымашым шукертак сулен. Студент-влаклан тудын илыш-корныжым пален налаш оҥай ыле. Любовь Николаевна шкенжын модмо рольжо-влак нерген, репетиций кузе эртыме нерген оҥайын каласкалыш, ятыр йодышлан вашештыш.

Вашлиймаш оҥай да пайдале лийын. Ме уна-влаклан таум ыштена да умбакыжат кугу сеҥымаш-влакым тыланен кодына.

---